ڈیرہ غازی خان اور کوہ سلمان کے علاقوں میں شدید بارشوں کے امکان کے باعث نقصانات کا خدشہ ہے

اسلام آباد ۔ 2 اگست (اُردو پوائنٹ اخبارتازہ ترین - اے پی پی۔02 اگست۔2016ء) نیشنل ڈیزاسٹر مینجمنٹ اتھارٹی کے سینئر ممبر احمد کمال نے کہا ہے کہ آنے والے دنوں میں ڈیرہ غازی خان اور کوہ سلمان کے علاقوں میں شدید بارشوں کے امکان کے باعث نقصانات کا خدشہ ہے۔ پی ٹی وی سے گفتگو کرتے ہوئے انھوں نے کہا کہ ملک بھر میں جاری مون سون کی بارشیں محکمہ موسمیات کی پیشنگوئی سے 25سے 27فیصد کم ہوئی ہیں اور آنے والے دو ماہ کے دوران مذید بہتر اور 20فیصد زیادہ بارشوں کا امکان ہے، انھوں نے کہا کہ یہ بارشیں بالائی اور شمالی پنجاب،خیبر پختونخوا، صوبہ سندھ اور بلوچستاں کے ساحلی علاقوں میں متوقع ہیں ۔

انھوں نے کہا کہ دو ماہ کے دوران ہونے والی بارشوں میں ڈیرہ غازی خان اور کوہ سلمان کے علاقوں ہونے والے بارشوں سے زیادہ نقصان کا خدشہ ہے۔

(جاری ہے)

نیشنل ڈیزاسٹر مینجمنٹ اتھارٹی کی کارکردگی کے حوالے سے گفتگو کرتے ہوئے انھوں نے کہا کہ ادارہ ناگہانی صورتحال میں صوبائی اورضلعی انتظامیہ کے ساتھ مل کر بحالی کے کاموں میں معاونت فراہم کرتا ہے تاہم صوبائی اور ضلعی انتظامیہ کو چاہیے کہ وہ اپنی کارکردگی کو مذید بہتر کریں۔

انھوں نے کہا کہ گزشتہ روز فاٹا میں باشوں سے ہونے والی تباہی میں ان کا ادارہ فاٹا ڈیزاسٹر مینجمنٹ کے ساتھ مل کر کام کر رہاہے۔احمد کمال نے کہا کہ اب تک 23جاں بحق افراد کی لاشوں کو برآمد کیا جاچکا ہے اور دیگر 5افراد کی تلاش کا کام جاری ہے۔ چترال میں گزشتہ سال زلزلے کے بعد بحالی کے کاموں کے حوالے سے پوچھے گئے سوال کا جواب دیتے ہوئے انھوں نے کہا کہ چترال میں بحالی کے لئے صوبائی حکومت کو تمام ضروری امدادی سامان فراہم کر دیا گیا ہے اور بہت جلد تمام اہداف حاصل کر لئے جائیں گے۔

مون سوں میں ممکنہ نقصانات سے بچاؤکے حوالے سے پوچھے گئے سوال کا جواب دیتے ہوئے انھوں نے کہا کہ آج کل کے دور میں میڈیا بہت فعال کردار اداکر رہاہے اور نیشنل ڈیزاسٹر مینجمنٹ اتھارٹی کی جانب سے جو بھی پیغام عوام کی سہولت کے لئے دیا جاتا ہے اسے وہ بر وقت نشر کر دیتا ہے۔ انھوں نے کہا کہ ہنگامی صورتحال میں عوام کو بھی فوری اور بھرپور ساتھ دینا چاہیے جس کے لئے ضروری ہے کہ وہ کیے گیے اعلان کے مطابق اپنے مال مویشیوں اور قیمتی سامان کو لیکر محفوظ مقامات پر منتقل ہو جائیں۔

انھوں نے کہا کہ ہنگامی صورتحال سے نمٹنے کے لیے انہیں وفاقی حکومت کی جانب سے پر ممکن مدد فراہم کی جاتی ہے آنے والے وقت میں وفاقی حکومت کی جانب سے ڈیزاسٹر فنڈ بھی قائم کیا جارہا ہے جو بہترین معاونت فراہم کرے گا۔