بھارتی حکومت نے ڈاکٹر ذاکر نائیک کے ادارے اسلامک ریسرچ فاؤنڈیشن پر غیر ملکی فنڈز وصول کرنے پر پابندی عائد کر دی

ہفتہ 10 ستمبر 2016 21:44

نئی دہلی(اُردو پوائنٹ اخبارتازہ ترین - این این آئی۔10ستمبر ۔2016ء) بھارت کی مودی حکومت نے پیس ٹی وی پر پابندی کے بعد معروف اسلامی سکالر ڈاکٹر ذاکر نائیک کے ادارے’’ اسلامک ریسرچ فاؤنڈیشن‘‘ پر بھی غیر ملکی فنڈ ز وصول کرنے پر پابندی عائد کر دی ۔بھارتی نجی چینل ’’ای ٹی وی ‘‘ کے مطابق وزارت داخلہ نے ریزرو بینک آف انڈیا سے کہا کہ ڈاکٹر ذاکر نائیک کے ادارے ’’اسلامک ریسرچ فاؤنڈیشن ‘‘ کو کوئی بھی رقم ریلیز کرنے سے پہلے وزارت کی اجازت لی جائے۔

(جاری ہے)

یاد رہے کہ بھارتی حکومت گذشتہ کچھ عرصہ سے ڈاکٹر ذاکر نائیک کے خلاف گھیرا تنگ کئے ہوئے ہے ،دنیا بھر میں اسلام کے پیغام امن کی دعوت عام کرنے والے ڈاکٹر ذاکر نائیک کے ٹی وی چینل ’’پیس ٹی وی پر بھی بھارتی حکومت نے پابندی عائد کردی تھی ،ڈاکٹر ذاکر نائیک نے بھارتی حکومت اور سیکیورٹی اداروں کی جانب سے اسلامک ریسرچ فاؤنڈیشن اور ’’پیس ٹی وی‘‘ پر لگائے جانے والے الزامات کو من گھڑت قرار دیتے ہوئے کہا کہ انہوں نے ہمیشہ امن کی بات کی ہے اور اسلام کے پیغام امن و سلامتی کی طرف لوگوں کو دعوت دی ہے ،انہوں نے کہا تھا کہ دنیا بھر میں کسی ایک جگہ بھی انہوں نے شدت پسندی یا دہشت گردی کی حمائیت نہیں کی۔