فیصل رضا عابدی کے عدلیہ مخالف بیان پر از خود نوٹس کیس کی سماعت‘ نجی ٹی وی چینل کو نوٹس

میاں محمد ندیم بدھ 18 اپریل 2018 13:29

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔18 اپریل۔2018ء) سپریم کورٹ نے پاکستان پیپلز پارٹی کے سابق رہنما و سینیٹر فیصل رضا عابدی کی جانب سے عدلیہ مخالف بیان دینے سے متعلق از خود نوٹس کیس کی سماعت کے دوران فیصل رضا عابدی کا بیان نشر کرنے والے نجی ٹی وی چینل کو نوٹس جاری کردیا۔چیف جسٹس میاں ثاقب نثار نے سپریم کورٹ میں فیصل رضا عابدی کی جانب سے مبینہ طور پر عدلیہ مخالف بیان دینے سے متعلق از خود نوٹس کی سماعت کی۔

عدالت نے از خود نوٹس کی سماعت کے دوران نجی ٹی وی چینل کو نوٹس جاری کرتے ہوئے 10 دن میں جواب جمع کرانے کا حکم دیا۔ چیف جسٹس نے ریمارکس دیئے کہ نجی ٹی وی چینل پر جو پروگرام چلایا گیا، کیا وہ توہین عدالت نہیں؟ انہوں نے کہا کہ فیصل رضا عابدی کہاں ہیں؟ جس نے گالیاں نکالیں اور ضیاءشاہد کہاں ہیں؟۔

(جاری ہے)

سپریم کورٹ میں فیصل رضا عابدی کے پیش نہ ہونے پر چیف جسٹس نے ریمارکس دیئے کہ فیصل رضا عابدی کو متعلقہ پولیس پیش کرے، اگر وہ نہیں آتے تو انہیں گرفتار کر کے لائیں۔

چیف جسٹس نے مزید ریمارکس دیئے کہ ایسے چینل کو بند کرنا چاہیے، بزرگ سمجھ کر عزت کرتے رہے لیکن یہ کیا گیا، شرم آنی چاہیے ٹی وی چینل کو۔ بعد ازاں عدالت نے چینل سے نوٹس پر جواب طلب کرتے ہوئے کیس کی سماعت 3 مئی تک کے لیے ملتوی کردی۔دوسری جانب پاکستان الیکٹرونک میڈیا ریگیولیٹری اتھارٹی (پیمرا) نے متعلقہ چینل کو10 لاکھ روپے جرمانہ اور پروگرام پر تین ماہ کی پابندی عائد کرنے کا اعلان کیا خیال رہے کہ اسی پروگرام میں فیصل رضا عابدی نے گفتگو کی تھی۔

پیمرا نے چینل کو پرائم ٹائم ٹرانسمیشن کے دوران معذرت جاری کرنے کی ہدایت بھی کی ہے۔اعلامیے کے مطابق کارروائی کے دوران چینل کا موقف سننے کے بعد پیمرا نے مذکورہ پروگرام پر 3 ماہ تک پابندی عائد کرنے کا فیصلہ کیا۔چینل انتظامیہ کو واضح کیا گیا کہ حکم نامے کی خلاف ورزی کی صورت میں قانون کے مطابق چینل کا لائسنس منسوخ کردیا جائے گا۔