فلم پرواز ہے جنون کا پہلا پرومو ریلیز کردیا گیا

جذبہ حب الوطنی، جوش و خروش، اور ایڈونچر سے بھرپور پرومو شائقین کو سینما وںکا رخ کرنے پر مجبور کردے گا

جمعرات 19 اپریل 2018 16:30

کراچی(اُردو پوائنٹ اخبارتازہ ترین - این این آئی۔ 19 اپریل2018ء) پاکستان ایئر فورس کو خراج تحسین پیش کرنے کیلئے مومنہ اینڈ درید اور ہم فلمز کے بینر تلے بننے والی فلم "پرواز ہے جنون"کا آفیشل ٹیزر پرومو ریلیز کردیا گیا ، یاد رہے کہ منفرد موضوع پر بننے والی فلم کا شائقین بے صبری سے انتظار کررہے ہیں، فلم عید الفطر پر ریلیز کی جائے گی۔جذبہ حب الوطنی، جوش و خروش، اور ایڈونچر سے بھرپور پرومو شائقین کو سینما وںکا رخ کرنے پر مجبور کردے گا۔

فلم میں حمزہ علی عباسی کونوجوان فائٹر پائلٹ آفیسر دکھایا گیا ہے، جو اپنے کوپائلٹس کو ہمیشہ اپنی فلائنگ اسکلز سے حیرت زدہ کرنے میں کامیاب نظر آتا ہے، یہ ایک ایسا شخص ہے جس کی تیز رفتاری ہی اس کا جنون ہے ۔ فلم کے پہلے ہی پرومو میں شاز خان کو بھی دکھایا گیا ہے جو کہ حمزہ کا دوست ہے۔

(جاری ہے)

فلم میں دکھایا گیا ہے کہ ایک ایئرفورس آفیسر کے لیے قوم کی حفاظت کتنی اہمیت رکھتی ہے کہ وہ اپنی جان کی پرواہ کیے بغیر اپنے ملکی دفاع کو ہمیشہ فوقیت دیتا ہے۔

فلم کے مرکزی کرداروں میں حمزہ علی عباسی، ہانیہ عامر، احد رضا میر، اور شاز خان شامل ہیں ، فلم کی ہدایات حسیب حسن نے دیں ہیں جبکہ کہانی فرحت اشتیاق نے تحریر کی ہے، فلم عید الفطر پر ریلیز کی جائے گی، جس کی ملک بھر میں تقسیم کی ذمہ داری ہم فلمز کے سپر د ہے۔ ہم فلم ایک پروڈکشن اور ڈسٹری بیوشن کمپنی ہے جس کا تعلق پاکستان کے علاقے کراچی سے ہے، ہم فلمز کا آغاز ستمبر 2014میں ہوا جو کہ ہم نیٹ ورک گروپ کے تحت کام کررہاہے۔ ادارہ "بن روئی"جیسی ملکی اور بین الاقوامی سطح پر پذیرائی حاصل کرنے والی فلم کی پروڈکشن کرچکا ہے جو کہ پاکستانی فلم انڈسٹری کے لیے ایک سنگ میل کی حیثیت رکھتی ہے۔