ڈیرہ اسماعیل خان میں صفائی کی آگاہی کے حوالے سے واٹر اینڈ سینیٹیشن سروسز کمپنی کے زیر اہتمام واک کا اہتمام

جمعہ 27 اپریل 2018 23:40

پشاور(اُردو پوائنٹ اخبارتازہ ترین - آن لائن۔ 27 اپریل2018ء) ڈیرہ اسماعیل خان میں صفائی کی آگاہی کے حوالے سے واٹر اینڈ سینیٹیشن سروسز کمپنی کے زیر اہتمام ایک واک کا اہتمام کیا گیا ۔یہ واک ضلع کچہری چوک سے ریسکیو15تک نکالی گئی جسکی قیادت چیف ایگزیکٹیو واسا احسان اللہ محسود نے کی۔ واک میں سول سوسائٹی،میڈیا اور واسا کے عملہ نے بھرپور شرکت کی ۔

اس حوالے سے صفائی کی اہمیت اور عوامی شرکت کے حوالے سے بینرز بھی اٹھائے گئے تھے ۔اس موقع پر واسا کے عملہ نے واک کے راستہ میں صفائی کا عملی مظاہرہ بھی کیا ۔

(جاری ہے)

واک کے اختتام پر خطاب کرتے ہوئے چیف ایگزیکٹیو واٹر اینڈ سینیٹیشن سروسز کمپنی احسان اللہ محسود نے کہا ہے کہ ہم ڈیرہ اسماعیل خان کے شہریوں کو صفائی کے حوالے سے صاف ستھرا ماحول فراہم کرینگے لیکن اسکے لئے عوام کی شرکت اور تعاون انتہائی ضروری ہے۔ عوام کی شرکت کے بغیر صفائی کا ہمارا خواب کبھی شرمندہ تعبیر نہیں ہوسکتا، شہری پلاسٹک کے بیگز نکاسی آب کے نالوں میں نہ پھنکیں کیونکہ پلاسٹک بیگز کی وجہ سے نکاسی آب کے نالے بند ہوجاتے ہیں ۔اسی طرح گند گی بھی غلط جگہوں پر نہ پھینکی جائے بلکہ ڈسٹ بین میں ڈالی جائے۔