اٹک میں حساس ادارے کی بس پر فائرنگ اور دھماکہ ، 2 افراد جاں بحق، 13 زخمی

حساس ادارے کی بس پرحملہ آو ر کی فائرنگ سے متعدد افراد زخمی ہوئے، ڈرائیور کی جانب سے پکڑنے کی کوشش کے دوران حملہ آور نے خود کوبارودی مواد کے ذریعے اڑا لیا، دھماکے میں بس ڈرائیور ،ایک راہگیر شہید ، حملہ آور بھی ہلاک ہوگیا،آرپی او راولپنڈی کی بریفنگ

جمعرات 3 مئی 2018 23:49

اٹک (اُردو پوائنٹ اخبارتازہ ترین - آئی این پی۔ 03 مئی2018ء) اٹک کے علاقے بسال روڈ پر ڈھوک گاما کے قریب بم دھماکے میں 2 افراد جاں بحق اور 13 شدید زخمی ہوگئے، حساس ادارے کی بس سپیڈ بریکر عبور کرنے کے لئے آہستہ ہوئی توموجود حملہ آو رنے فائرنگ شروع کردی جس میں متعدد افراد زخمی ہوئے، ڈرائیور نے بس سے اتر کرحملہ آورکو پکڑنے کی کوشش کی تاہم حملہ آور نے بارودی مواد کے ذریعے خود کو اڑا لیا، دھماکے کے نتیجے میں بس ڈرائیور اور ایک راہگیر شہید ، حملہ آور بھی ہلاک ہوگیا۔

جمعرات کو نجی ٹی وی کے مطابق اٹک میں بسال روڈ پر ڈھوک گاما کے قریب بم دھماکے کے نتیجے میں 2 افراد جاں بحق جب کہ 13 افراد زخمی ہوگئے۔ دھماکے کے فوری بعد ڈی پی او اٹک اور آرپی او راولپنڈی فخر سلطان راجہ جائے حادثہ پہنچے اور پولیس اہلکاروں کی مدد سے شواہد اکٹھے کئے اور زخمی افراد کو مختلف ہسپتالوں میں منتقل کردیا گیا۔

(جاری ہے)

آرپی او راولپنڈی نے واقعے سے متعلق بریفنگ دیتے ہوئے بتایا ہے کہ حساس ادارے کے ملازم چھٹی کرکے گھروں کو جارہے تھے، بس سپیڈ بریکر عبور کرنے کے لئے آہستہ ہوئی تو حملہ آور کی طرف سے فائرنگ شروع کردی گئی اور بس میں سوار ملازمین کو نشانہ بنایا گیا جس میں متعدد افراد زخمی ہوئے، حملہ آور کی جانب سے فائرنگ رکتے ہی ڈرائیور نے بس سے اتر کو فائرنگ کرنے والے شخص کو پکڑنے کی کوشش کی تاہم حملہ آور نے بارودی مواد کے ذریعے خود کو اڑا لیا جس کے نتیجے میں بس ڈرائیور اور ایک راہگیر شہید ہوگئے جب کہ دھماکے میں حملہ آور بھی ہلاک ہوگیا۔