محکمہ زراعت نے زرعی اجناس موسم کے مطابق کاشت کرنے کیلئے تحقیق کا آغاز کر دیا

پیر 21 مئی 2018 17:10

لاہور(اُردو پوائنٹ اخبارتازہ ترین - اے پی پی۔ 21 مئی2018ء) محکمہ زراعت نے زرعی اجناس موسم کے مطابق کاشت کرنے کیلئے تحقیق کا آغاز کر دیا ، منصوبہ کا مقصد کسان کو موسم کے مطابق فصلوں کی کاشت کرنے کیلئے اقدامات تجویز کرنا ہے ، ایوب زرعی تحقیقاتی ادارہ فیصل آباد نے ایک منصوبہ پر کام شروع کر دیا ہے جس کے تحت پنجاب کی آب و ہوا میں اعلیٰ قدر کی پھلدار فصلوں پر تحقیق اور تعارف کرایا جائے گا، اس منصوبے کی کل مالیت 3 کروڑ 46لاکھ روپے ہے جس میں سے 46لاکھ 57ہزار روپے سال 2017-18کے لئے مختص کئے گئے ہیں، منصوبہ کی کل مدت پانچ سال ہے اور یہ منصوبہ چکوال کے لئے ہے، اس منصوبے کا مقصد خط پوٹھوار کے لئے اعلیٰ قدر کی پھلدار فصلوں کی جدید اقسام کا انتخاب کرناہے،اس منصوبہ سے اعلیٰ قدر کی 9پھلدار فصلوں (پستہ، انجیر، چیکو، نیکٹرین، بیریز، انگور وغیرہ) کے 919پودوں کی درآمد اور ان پر تحقیق کا آغاز ہو چکا ہے۔