چیف جسٹس ہمارے لئے قابل احترام اور معتمد شخصیت کے مالک ہیں،حافظ حسین احمد

ہم انہیں صادق اور امین سمجھتے ہیں، ان کے فیصلوں سے اتفاق یا اختلاف کی گنجائش رہتی ہے، ان کی نیت پر شبہ نہیں کرتے، ترجمان جمعیت علمااسلام پاکستان کا بیان

جمعرات 7 جون 2018 13:15

اسلام آباد (اُردو پوائنٹ اخبارتازہ ترین - آئی این پی۔ 07 جون2018ء) جمعیت علمااسلام پاکستان کے مرکزی ترجمان حافظ حسین احمد نے کہا ہے کہ سپریم کورٹ آف پاکستان کے چیف جسٹس ہمارے لئے قابل احترام اور معتمد شخصیت کے مالک ہیں۔ہم انہیں صادق اور امین سمجھتے ہیں ان کے فیصلوں سے اتفاق یا اختلاف کی گنجائش رہتی ہے۔

(جاری ہے)

لیکن ان کی نیت پر شبہ نہیں کرتے،اس عظیم اور ذمہ دار منصب کی حامل شخصیت نے جمعیت علمااسلام کے امیر مولانا فضل الرحمن کے بارے میں جو ریمارکس دیئے ہیں کہ " ان کے پاس بہت پیسہ ہے وہ اپنی سیکیورٹی کا انتظام خود کرسکتے ہیں "چیف جسٹس صاحب کی اسطرح کی رائے کی حیثیت ایک عام قیاس آرائی سے زیادہ نہیں۔

یعنی انہوں نے حقائق کی بنیاد پر نہیں بلکہ سوشل میڈیا اور عامی ہفوات اور پروپیگنڈوں کی بنیاد پر ایسی رائے دی ہے۔ جو حقائق کو جاننے والوں میں حقائق سے بہت دور تصور کی جارہی ہے۔ہم امید کرتے ہیں کہ چیف جسٹس اپنے منصب عظمی کی شایان شان کسی قومی سطح کی شخصیت کے بارے میں احتیاط سے تبصرہ کریں گے۔