کوئٹہ کے نواح میں واقع تفریحی مقام ہنہ جھیل کا بڑا حصہ ایک مرتبہ پھر خشک ہوگیا

پیر 25 جون 2018 15:20

کوئٹہ(اُردو پوائنٹ اخبارتازہ ترین - این این آئی۔ 25 جون2018ء) صوبہ بلوچستان کے دارالحکومت کوئٹہ کے نواح میں واقع تفریحی مقام ہنہ جھیل کا بڑا حصہ ایک مرتبہ پھر خشک ہوگیا۔کوئٹہ شہر سے تقریباً 18کلومیٹر کے فاصلے پر واقع پہاڑوں میں گھری ہنہ جھیل رواں سال اپریل میں بارشوں کے بعد پانی سے تقریباً بھر گئی تھی، تاہم اب جھیل کا ایک بڑا حصہ 2 ماہ کے عرصے میں خشک ہوگیا ہے ،ْ اس وقت ہنہ جھیل کے محض تھوڑے سے حصے پر پانی موجود ہے اور بیشتر حصہ خشک ہونے کے باعث جھیل چٹیل میدان کا منظر پیش کرنے لگی ہے۔

پانی خشک ہونے کے باعث جھیل کے وسطی حصے پر پڑی دراڑیں واضح طور پر دیکھی جاسکتی ہیں اور تفریح کے لیے آنے والے سیاح جھیل کے خشک حصے پر چہل قدمی کرتے نظر آتے ہیں ،ْہنہ جھیل کا بڑا حصہ خشک ہونے سے جھیل میں واٹر اسپورٹس کا سلسلہ بھی بند ہوگیا ہے جس سے کھلاڑیوں میں مایوسی کی لہر دوڑ گئی ہے۔

(جاری ہے)

واضح رہے کہ رواں برس اپریل میں جھیل پانی سے تقریباً بھر گئی تھی تاہم کوئٹہ میں درجہ حرارت بڑھنے اور گرمی کے باعث جھیل کا پانی خشک ہوگیا ہے ،ْآبی ماہرین کے مطابق اگر موسم گرما میں بارشیں نہ ہوئیں تو جھیل مکمل طور پر خشک ہوجائے گی۔ہنہ جھیل خشک ہوجانے سے آئندہ سال موسم سرما میں سائیبریا سے آبی پرندوں کی آمد کا سلسلہ بھی شدید متاثر ہوگا۔