سابق وزیر اعظم شاہد خاقان عباسی کے خلاف توہین عدالت کی درخواست کی سماعت (کل) ہو گی

جمعرات 28 جون 2018 22:56

راولپنڈی (اُردو پوائنٹ اخبارتازہ ترین - اے پی پی۔ 28 جون2018ء) سابق وزیر اعظم شاہد خاقان عباسی کے خلاف توہین عدالت کی درخواست کی سماعت (کل) جمعہ 29جون کو لاہور ہائی کورٹ راولپنڈی بنچ میں ہو گی ۔ راولپنڈی کے شہری نے سابق وزیر اعظم شاہد خاقان عباسی کے خلاف لاہور ہائی کورٹ راولپنڈی بنچ میں توہین عدالت کی درخواست دائرکی ہے جس کی سماعت آج (جمعہ کو )لاہور ہائی کورٹ راولپندی بنچ کے جسٹس طارق عباسی کریں گے ۔

ملک ریاض انجم نامی شہری نے فاروق اعوان ایڈووکیٹ کے ذریعے دائردرخواست میں شاہد خاقان عباسی چیئرمین پیمرااور سیکرٹری وزارت اطلاعات و نشریات کو فریق بناتے ہوئے موقف اختیار کیا ہے کہ ہائی کورٹ راولپنڈی بنچ کے جسٹس عباد الرحمان لودھی پر مشتمل خصوصی الیکشن ٹریبونل نے 27جون کوسابق وزیر اعظم شاہد خاقان عباسی کے خلاف انتخابی عذرداری میں انہیں آرٹیکل 62(1)Fکے تحت تاحیات نااہل قرار دیا جس کے رد عمل میں شاہد خاقان عباسی نے نجی ٹی وی چینل کے پروگرام میں معززجسٹس عباد الرحمان لودھی کے خلاف توہین آمیزاور ماورائے آئین زبان استعمال کی ۔

(جاری ہے)

درخواست میں کہا گیا ہے کہ عدلیہ یا کسی بھی معزز جج کے خلاف توہین آمیز زبان کا استعمال آئین کے آرٹیکل204اور توہین عدالت آرڈی نینس 2003کے تحت قابل گرفت اقدام ہے۔