اسرائیل کا سرحد پار شامی فوجی پوسٹوں پر حملہ

گولن کی پہاڑیوں کے قریب میزائلوں سے فوجی ٹھکانوں کو نشانہ بنایا گیاکوئی جانی نقصان نہیں ہوا، شامی سرکاری ٹی وی

جمعہ 13 جولائی 2018 16:05

دمشق(اُردو پوائنٹ اخبارتازہ ترین - آن لائن۔ 13 جولائی2018ء) اسرائیل نے سرحد پار شامی فوج کے ٹھکانوں کو نشانہ بنایا جس کے نتیجے میں فوجی پوسٹوں کو نقصان پہنچا۔غیر ملکی خبر رساں ادارے کے مطابق اسرائیل نے گولن کی پہاڑیوں کی دوسری طرف شامی حدود میں فوج کی پوسٹوں کو نشانہ بنایا جب کہ اس کی ویڈیو بھی جاری کی گئی ہے۔

(جاری ہے)

شام کی سرکاری خبر ایجنسی کا کہنا ہے کہ جنوبی صوبہ قونترا میں گولن کی پہاڑیوں کے قریب میزائلوں سے فوجی ٹھکانوں کو نشانہ بنایا گیا تاہم اس میں کوئی جانی نقصان نہیں ہوا۔

دوسری جانب اسرائیلی فوج کا کہنا ہے کہ اس نے اسرائیل کی حدود میں آنے والے ڈرون کو گرانے اور پھر مزاحمت کے بعد شامی فوج کی تین پوسٹوں کو نشانہ بنایا۔اسرائیلی ڈیفنس فورس نے اپنے بیان میں کہا کہ شام اپنی حدود سے سرحد پار کارروائیاں روکنے کا ذمہ دار ہے، اگر سرحد پار سے کارروائیاں ہوئیں تو مزید اقدامات کیے جائیں گے۔