سعودی عرب کے شہر نجران پر حوثیوں کا بیلسٹک میزائل حملہ ناکام

بیلسٹک میزائل یمنی اراضی کے اندر ہی مار گرایا، کسی قسم کے جانی نقصان کی کوئی اطلاع نہیں ملی،سعودی فوج

جمعہ 10 اگست 2018 12:14

ریاض(اُردو پوائنٹ اخبارتازہ ترین - این این آئی۔ 10 اگست2018ء) سعودی عرب کی فوج کے فضائی دفاعی نظام نے یمن کے حوثی باغیوں کی طرف سے مملکت کے شہر نجران پر داغا گیا بیلسٹک میزائل یمنی اراضی کے اندر ہی مار گرایا۔ واقعے میں کسی قسم کے جانی نقصان کی کوئی اطلاع نہیں ملی۔

(جاری ہے)

میڈیارپورٹس کے مطابق اس سے قبل یمن میں آئینی حکومت کی سپورٹ کرنے والے عرب اتحاد کے سرکاری ترجمان کرنل ترکی المالکی نے بتایا تھا کہ یمن کے صوبے صعدہ میں کی جانے والی عکسری کارروائی اٴْن عناصر کو نشانہ بنانے کے لیے کی گئی جنہوں نے بدھ کے روز جازان پر ایک بیلسٹک میزائل حملہ کیا تھا۔

سعودی فضائی دفاعی نظام نے بدھ کے روز جازان پر داغا جانے والا بیلسٹک میزائل فضا میں تباہ کر دیا تھا۔ میزائل کے ٹکڑے لگنے سے دو سعودی شہری زخمی ہوئے۔اس سے قبل پیر کی شب حوثیوں کی جانب سے سعودی عرب کے جنوب میں نجران پر ایک اور بیلسٹک میزائل حملے کی کوشش بھی ناکام بنا دی گئی تھی۔