ضلع چکوال کے چھ اراکین پنجاب اسمبلی نے رکنیت کا حلف اٹھا لیا

بدھ 15 اگست 2018 20:44

چکوال(اُردو پوائنٹ اخبارتازہ ترین - آن لائن۔ 15 اگست2018ء) ضلع چکوال کے چھ اراکین پنجاب اسمبلی نے بدھ کے روز اپنی رکنیت کا حلف اٹھا لیا۔ حلف اٹھانے والوں میں راجہ یاسر سرفراز، ملک تنویر اسلم سیتھی، سردار آفتاب اکبر، حافظ عمار یاسر، مہوش سلطانہ اورآسیہ امجد شامل ہیں۔ ان میں سے تین کا تعلق پی ٹی آئی،دو کا تعلق مسلم لیگ ن جبکہ ایک کا تعلق مسلم لیگ ق سے ہے۔

(جاری ہے)

سردار آفتاب اکبر اور حافظ عمار یاسر نامزد سپیکر پنجاب اسمبلی چوہدری پرویز الہٰی کے ہمراہ اجلاس میں حلف اٹھانے کے بعد باہر آئے تو پرویز الہٰی نے میڈیا سے گفتگو کی ، وہاں پر سردار آفتاب اکبر اور حافظ عمار یاسر بھی ان کے ہمراہ تھے۔ چوہدری پرویز الہٰی نے اس موقع پر گفتگو کرتے ہوئے بتایا کہ انشاء اللہ پنجاب میں ایک مستحکم حکومت بنائیں گے اور تمام اتحادیوں کو ساتھ لیکر چلیں گے۔ انہوں نے کہا کہ عمران خان کے تبدیلی کے نعرے کو عملی شکل دینے کیلئے تمام ذمہ داروں کو بھرپور کارکردگی دکھانی ہوگی۔