عبدالستار ایدھی فیسٹیول ،کے ڈی اے نے کراچی جیم خانہ کرکٹ ٹیم کو شکست دیدی

پیر 8 اکتوبر 2018 19:48

کراچی (اُردو پوائنٹ اخبارتازہ ترین - آن لائن۔ 08 اکتوبر2018ء) عبدالستار ایدھی فیسٹیول کرکٹ میچ کے ڈی اے کرکٹ ٹیم اور کراچی جیم خانہ کرکٹ ٹیم کے مابین کھیلا گیا۔ کراچی جیم خانہ کرکٹ ٹیم نے ٹاس جیت کر پہلے بیٹنگ کرنے کا فیصلہ کیا۔ مقررہ اوورز میں جیم خانہ کرکٹ ٹیم نے 169 رنز بنائے۔ مقررہ ہدف کا کامیابی سے تعاقب کرتے کے ڈی اے کرکٹ ٹیم نے فتح حاصل کی۔

کے ڈی اے کرکٹ ٹیم کی جانب سے کپتان فرخ رضوی نے 23گیندوں پر 45 رنز کی شاندار اننگز کھیلی۔ فرخ رضوی شاندار کھیل پیش کرنے پر مین آف دی میچ قرار پائے۔

(جاری ہے)

ڈائریکٹر جنرل ادارہ ترقیات کراچی سمیع الدین صدیقی نے کے ڈی اے کرکٹ ٹیم کی کامیابی پر مبارک باد پیش کرتے ہوئے کہا کہ مستقبل قریب میں کے ڈی اے کرکٹ ٹیم سے مایہ ناز کھلاڑی سامنے آئیں گے جو پاکستان کا نام روشن کرنے میں مرکزی کردار ادا کریں گے۔

میچ کے دوران پریذیڈنٹ پاک کریسنٹ لیاقت علی، جنرل سیکریٹری پاک کریسنٹ عارف حسین، آرگنائزر نجیب اللہ قریشی، چیف آرگنائزر سید علی اظہر، کے ڈی اے ڈائریکٹر اسپورٹس محمد ناصر، ایڈیشنل ڈائریکٹر اسپورٹس ایاز منشی، اسپورٹس آرگنائزر ایم نسیم، مجاہد حسین، منیجر کے ڈی اے کرکٹ ٹیم جاوید اقبال، کوچ سید عاصم و دیگر افسران موجودتھے۔#