وزیر مملکت برائے داخلہ شہریارخان آفریدی سے صدر بین الاقوامی اسلامی یونیورسٹی ڈاکٹر احمد یوسف الدریویش کی ملاقات

ملاقات میں پاک سعودی تعلقات، امت مسلمہ کی بہتری اور اسلامی معاشروں کی ترقی میں جامعات کے کردار پر تبادلہ خیال

اتوار 21 اکتوبر 2018 16:10

اسلام آباد ۔ (اُردو پوائنٹ اخبارتازہ ترین - اے پی پی۔ 21 اکتوبر2018ء) وزیر مملکت برا ئے داخلہ شہریارخان آفریدی سے صدر بین الاقوامی اسلامی یونیورسٹی ڈاکٹر احمد یوسف الدریویش نے ملاقات کی۔ وزیر مملکت کے دفتر میں ہونے والی ملاقات میں پاک سعودی تعلقات، امت مسلمہ کی بہتری اور اسلامی معاشروں کی ترقی میں جامعات کے کردار پر تبادلہ خیال کیا گیا۔

یونیورسٹی کے شعبہ تعلقات عامہ کی جانب سے جاری بیان کے مطابق اس موقع پر وزیر مملکت نے کہا کہ پاکستان سعودی عرب کے ساتھ تعلقات کو خصوصی اہمیت دیتا ہے۔ انہوں نے کہا کہ دونوں ممالک کے عوام کے دل ایک دوسرے سے جڑے ہیں۔ شہریار آفریدی نے کہا کہ عصر حاضر کی اہم ضرورت ہے کہ مسلم ممالک کی جامعات نوجوانان امت کو ٹیکنالوجی میں ترقی اور نئے عصری تقاضوں کے مطابق تعلیم دیں۔

(جاری ہے)

ڈاکٹر احمد یوسف الدریویش نے وزیر مملکت کو یونیورسٹی کا تفصیلی تعارف پیش کیا اور انہیں شدت پسندی کی حوصلہ شکنی اور امن کی ترویج میں جامعہ کے کردار بارے آگا کیا۔ انہوں نے شہریارآفریدی کو یونیورسٹی کا دورہ کرنے اور طلباء سے خطاب کی بھی دعوت دی۔ اس موقع ہر جامعہ کے نائب صدر ڈاکٹر طاہر خلیلی، صدر جامعہ کے مشیر ڈاکٹر عزیزالرحمن، ڈین ڈاکٹر ارشدضیا اور پرووسٹ شعیب عبداللہ بھی موجود تھے۔