وزیراعظم عمران خان ملک سے غربت کے خاتمے کے لیے جلد انقلابی اقدامات کا اعلان کریں گے

وزیراعظم کے معاون خصوصی برائے سیاسی امور نعیم الحق کی گفتگو

جمعہ 9 نومبر 2018 23:01

وزیراعظم عمران خان ملک سے غربت کے خاتمے کے لیے جلد انقلابی اقدامات ..

اسلام آباد ۔ (اُردو پوائنٹ اخبارتازہ ترین - اے پی پی۔ 09 نومبر2018ء) وزیراعظم کے معاون خصوصی برائے سیاسی امور نعیم الحق نے کہا ہے کہ وزیراعظم عمران خان جلد ہی ملک سے غربت کے خاتمے کے لیے انقلابی اقدامات کا اعلان کریں گے۔ پی ٹی وی سے بات چیت کرتے ہوئے انہوں نے کہا کہ وزیراعظم عمران خان چین کے غربت کے خاتمے اور زراعت کے شعبے کو بہتر بنانے کے انقلابی اقدامات سے بھی بہت متاثر ہیں۔

(جاری ہے)

انہوں نے کہا کہ پاکستان تحریک انصاف اپنی حکومت کے قیام سے قبل سے ہی زراعت کے شعبے میں بہتری کے لیے اصلاحات اور ملک سے غربت کے خاتمے کے لیے چین کے ساتھ بات چیت کر رہی ہے۔ معاون خصوصی کا کہنا تھا کہ ملک میں زراعت کے شعبے کو ہمیشہ نظر انداز کیا گیا لیکن موجودہ حکومت اصلاحات متعارف کرا کے اس شعبے میں بہتری لائے گی۔ ایک سوال کے جواب میں انہوں نے کہا کہ پی ٹی آئی نے ہمیشہ پاک چین اقتصادی راہداری منصوبے کی حمایت کی ہے کیونکہ اس میگا منصوبے سے قومی معیشت بہتر ہو گی اور سٹیل، سیمنٹ، زراعت اور بنیادی ڈھانچے سمیت دیگر شعبوں کو بہتر بنانے میں مدد ملے گی۔