ضلعی انتظامیہ کی نگرانی ترنول میں مین جی ٹی روڈ پشاور کے دونوں اطراف تجاوزات کے خلاف آپریشن ،خان پلازہ سمیت کئی دکانیں مسمار کر دی گئیں

منگل 20 نومبر 2018 23:39

اسلام آباد ۔ (اُردو پوائنٹ اخبارتازہ ترین - اے پی پی۔ 20 نومبر2018ء) وفاقی دارالحکومت کے دیہی علاقہ ترنول میں مین جی ٹی روڈ پشاور کے دونوں اطراف ضلعی انتظامیہ کی نگرانی میں تجاوزات کے خلاف آپریشن کے دوران خان پلازہ سمیت کئی دکانیں مسمار کر دی گئیں۔ تفصیلات کے مطابق وفاقی دارالحکومت کے دیہی علاقہ ترنول میں مین جی ٹی روڈ پشاور پر قبضہ مافیا اور تجاوزات کے خلاف آپریشن دوسرے روز بھی جاری رہا۔

آپریشن کی قیادت اسسٹنٹ کمشنر رورل کر رہے تھے جبکہ ان کے ساتھ کیپٹل ڈویلپمنٹ اتھارٹی، اسلام آباد میٹرو پولیٹن کارپوریشن، نیشنل ہائی وے اتھارٹی کے حکام بھی موجود تھے۔ واضح رہے کہ تجاوزات کے خاتمہ کیلئے ضلعی انتظامیہ نے دو ماہ قبل تجاوزات ختم کرنے کے نوٹس جاری کئے تھے۔

(جاری ہے)

نوٹس کی مدت ختم ہونے کے بعد آپریشن کا مرحلہ شروع ہوا تو ترنول میں دو منزلہ خان پلازہ جو سرکاری اراضی پر تعمیر کیا گیا تھا، کو گرا دیا گیا جبکہ اس کے علاوہ سرکاری زمین پر غیر قانونی طور پر تعمیر کی کئی دکانیں بھی مسمار کر دی گئیں۔

آپریشن کے موقع پر پولیس کی بھاری نفری کسی بھی ناخوشگوار واقعہ سے نمٹنے کیلئے موجود رہی تاہم آپریشن کے موقع پر کوئی بھی ناخوشگوار واقعہ پیش نہیں آیا۔ اس موقع پر تھانہ ترنول کے ایس ایچ او سمیت دیگر پولیس افسران بھی موقع پر موجود تھے۔