پاک بحریہ نے اور ماڑہ کے قریب حشیش سے بھرا ہوڑا قبضے میں لے لیا

پیر 26 نومبر 2018 23:32

کراچی(اُردو پوائنٹ اخبارتازہ ترین - آن لائن۔ 26 نومبر2018ء) : پاکستان بحریہ نے خفیہ معلومات پر آپریشن کرتے ہوئے اوماڑہ کے قریب حشیش کی بڑی مقدار قبضے میں لے لی۔قبضے میں لی جانے والی حشیش کی مالیت کئی لاکھ ڈالر ہے۔ پاک بحریہ کا یہ کامیاب آپریشن خفیہ معلومات کو مسلسل اکٹھا کرنے اور مستقل نگرانی کے بعد کیا گیا۔

(جاری ہے)

انسداد منشیات فورس کے تعاون سے کئے جانے والے اس پیچیدہ اور مشکل آپریشن میں تقریبا 1500 کلو گرام حشیش قبضے میں لی گئی۔

بعد ازاں قبضے میں لی گئی حشیش کو مزید قانونی کاروائی کے لئے اینٹی نارکوٹکس فورس کے حوالے کر دیا گیا۔منشیات کے خلاف کامیاب آپریشن اس بات کا مظہر ہے کہ پاک بحریہ اپنے ساحل اور سمندر کے غیر قانونی سرگرمیوں میں استعمال کو روکنے کے لیے پر عزم ہے اور بحر ہند میں قانون کی عملداری قائم کرنے کی قومی اور بین الاقوامی ذمہ داری کو پورا کرنے کے لیے ہمہ وقت تیارہے۔