ماضی میں حکمرانوں نے محض ذاتی اختلافات کی بنا پر پروڈکشن آرڈرز کے حوالے سے کوئی قانون سازی نہیں کی،

ہمیں ماضی کی روایات کو نہیں دہرانا بلکہ اپنی ذات سے بالاتر ہو کرایسا کام کرنا ہے جس سے جمہوریت کو فائدہ ہو سپیکر پنجاب اسمبلی چودھری پرویز الٰہی کا ایوان میں اظہار خیال

جمعرات 13 دسمبر 2018 23:49

لاہور۔13 دسمبر(اُردو پوائنٹ اخبارتازہ ترین - اے پی پی۔ 13 دسمبر2018ء) سپیکر پنجاب اسمبلی چودھری پرویز الٰہی نے پنجاب اسمبلی کے اجلاس کی صدارت کے دوران پنجاب اسمبلی میں نیب کے زیر حراست رکن صوبائی اسمبلی خواجہ سلمان رفیق کے پروڈکشن آرڈرز کے معاملہ پر اظہار خیال کرتے ہوئے کہا ہے کہ یہ مسئلہ کسی پارٹی کی ہار جیت کا نہیں بلکہ یہ ایک تاریخی فیصلہ ہو گا جس سے ممبران اسمبلی کا تقدس بحال ہو گا اور ایک مثبت روایت قائم ہو گی۔

انہو ں نے مزید کہا کہ نہایت افسوس کے ساتھ کہنا پڑ رہا ہے کہ ماضی میں حکمرانوں نے محض ذاتی اختلافات کی بنا پر پروڈکشن آرڈرز کے حوالے سے کوئی قانون سازی نہیں کی، جس کی ماضی میں کئی مثالیں موجود ہیں۔ سپیکر پنجاب اسمبلی نے مزیدکہا کہ ہمیں ماضی کی روایات کو نہیں دہرانا بلکہ اپنی ذات سے بالاتر ہو کرایسا کام کرنا ہے جس سے جمہوریت کو فائدہ پہنچے ، اسمبلی کا وقار بلند ہواور آنے والے وقتوں میں پنجاب اسمبلی اور دوسری اسمبلیوں کے لئے مثال قائم ہو۔

(جاری ہے)

اس تاریخی فیصلہ سے عام آدمی کی نظرمیں اسمبلی کا وقار بلند ہو گا ۔ صوبائی وزیر قانون محمد بشارت راجہ اور دیگر اراکین اسمبلی نے سپیکر کے اظہار خیال کو خراج تحسین پیش کیا اور اس معاملہ پر باقاعدہ غورو فکر کے بعد قانون سازی کرنے کی تجویز پیش کی۔