میر پور یونیورسٹی آف سائنس اینڈ ٹیکنالوجی کے رجسٹرار کی صدر آزاد کشمیر سے ملاقات

جامعہ کے شعبہ قانون کے لئے پاکستان بار کونسل سے عدم اعتراض کے سرٹیفکیٹ کے حصول میں حائل رکاوٹوں سے آگاہ کیا

جمعہ 8 فروری 2019 16:57

اسلام آباد(اُردو پوائنٹ اخبارتازہ ترین۔ 08 فروری2019ء) میر پور یونیورسٹی آف سائنس اینڈ ٹیکنالوجی (مسٹ) کے رجسٹرار وارث جرال نے صدر آزاد کشمیر اور یونیورسٹی کے چانسلر سردار مسعود خان سے ملاقات کی اور انہیں جامعہ کے شعبہ قانون کے لئے پاکستان بار کونسل سے عدم اعتراض کے سرٹیفکیٹ کے حصول میں حائل رکاوٹوں سے آگاہ کیا۔

(جاری ہے)

یونیورسٹی رجسٹرار نے چانسلر اور صدر آزادکشمیر کو بتایا کہ جامعہ کے شعبہ قانون کے لئے عدم اعتراض کے سرٹیفکیٹ کے لئے جامعہ کی انتظامیہ نے پاکستان بارکونسل کی فیس سمیت تمام مطلوبہ دستاویزات مہیا کر دیں تھی اور اس سلسلے میں بار کونسل کے وائس چیئرمین کو متعدد مکتوبات تحریرکرنے کے علاوہ بار کونسل کی طرف سے اٹھائے گئے اعتراضات کو بھی دور کر دیا لیکن بدقسمتی سے اس سلسلے میں ابھی تک کوئی پیش رفت نہیں ہو سکی۔

صدر آزادکشمیر اور جامعہ کے چانسلر سردار مسعود خان نے جامعہ کے رجسٹرار کو یقین دلایا کہ وہ اس سلسلے میں متعلقہ ذمہ داران سے رابطہ کر کے اس دیرینہ مسئلہ کو حل کرانے کی کوشش کریں گے تاکہ طلبہ و طالبات میں پائی جانے والی غیر یقینی کی صورتحال ختم ہو۔