حوثیوں نے 100 سے زیادہ امدادی ٹرکوں کو روک دیا

اقوام متحدہ امدادی سامان کی لوٹ مار کرنے والوں کا نام لے ‘ یمنی حکومت

جمعرات 21 فروری 2019 12:20

صنعاء (اُردو پوائنٹ اخبارتازہ ترین - این این آئی۔ 21 فروری2019ء) یمن کی حکومت نے اقوام متحدہ کے سکریٹری جنرل کے سکریٹری برائے امورِ انسانی حقوق اور ہنگامی امداد کے امور کے رابطہ کار مارک لوکک کی اٴْس بریفنگ پر تنقید کی ہے جو انہوں نے یمن میں انسانی صورت حال کے حوالے سے سلامتی کونسل میں پیش کی۔یمن میں مقامی انتظامیہ کے وزیر اور امداد کی سپریم کمیٹی کے سربراہ عبدالرقیب فتح نے اس امر کی مذمت کی ہے کہ مارک لوکک نے امدادی کارروائیوں کے خلاف باغی حوثی ملیشیا کی خلاف ورزیوں کا ذکر نہیں کیا۔

عبدالرقیب کے مطابق اقوام متحدہ کے مبصرین کی الحدیدہ میں آمد کے بعد حوثیوں نے 100 سے زیادہ امدادی ٹرکوں کو روک دیا۔ ان میں 5 ٹرک ہیضہ اور ملیریا کی ادویات لے کر آئے تھے۔

(جاری ہے)

انہوں نے مزید بتایا کہ حوثیوں نے عالمی ادارہ خوراک کے ایک وفد کو تعز صوبے کے مشرقی داخلی راستے پر یرغمال بنا لیا اور انہیں انسانی صورت حال سے آگاہی حاصل کرنے کے لیے صوبے میں داخلے سے روک دیا۔ علاوہ ازیں باغیوں نے اقوام متحدہ کی تنظیموں کے گوداموں کو چار مرتبہ مارٹر گولوں کا نشانہ بنایا۔یمنی وزیر نے اقوام متحدہ کے عہدیداران سے مطالبہ کیا ہے کہ اس فریق کا اعلانیہ تعین کریں جو انسانی کارروائیوں میں رکاوٹ ڈال رہا ہے اور امدادی سامان کی لوٹ مار میں مصروف ہے۔