پاکستان کی فضائی حدود کو عالمی پروازوں کیلئے بند کرنے سے بھارتی سرکاری ایئر لائن کو سب سے زیادہ نقصان ہوا

بھارتی سول ایوی ایشن نے ایئرلائن کے کرایوں میں اضافے کو خارج از امکان قرار دیا ، میڈیا رپورٹ

منگل 19 مارچ 2019 23:27

نئی دہلی(اُردو پوائنٹ اخبارتازہ ترین - این این آئی۔ 19 مارچ2019ء) پاکستان کی جانب سے اپنی فضائی حدود کو عالمی پروازوں کیلئے بند کرنے سے سب سے زیادہ نقصان بھارتی سرکاری ایئر لائن کو ہوا ہے۔میڈیا رپورٹ کے مطابق بھارت سے کشیدگی کے باعث 27 فروری سے پاکستان نے بین الاقوامی پروازوں کیلئے اپنی فضائی حدود کو بند کردیا تھا جس کے نتیجے میں 400 پروازیں یا تو منسوخ ہوگئیں یا ان کے رٴْوٹ میں تبدیلی کردی گئی تاہم اس عمل سے سب سے زیادہ نقصان بھارتی ایئرلائن کو ہوا۔

بھارت سے براستہ پاکستان ہفتے میں 66 پروازیں یورپ اور 33 پروازیں امریکا کے لیے جاتی ہیں، جو یا تو منسوخ کردی گئیں یا ان کے رٴْوٹ میں تبدیلی کردی گئی جس سے بھارتی ایئرلائن کو مجموعی طور پر 60 کروڑ روپے کا نقصان ہوا۔

(جاری ہے)

ایئر انڈیا کی پروازوں کو اب گجرات سے جنوبی موڑ لیتے ہوئے بحریہ عرب سے پرے ہوتے ہوئے اپنی منزل مقصود کی جانب سفر کرنا ہوتا ہے جس سے اخراجات میں بے پناہ اضافہ ہوجاتا ہے جس کے باعث ایئر انڈیا کی واشنگٹن، نیویارک اور شکاگو جانے والی پروازوں کو سب سے زیادہ مشکلات کا سامنا ہے۔

دوسری جانب بھارتی ایئرلائن نے اس بھاری نقصان کو مزید اٴْٹھانے سے انکار کرتے ہوئے کرائے میں اضافے کا مطالبہ کردیا ہے تاہم بھارتی سول ایوی ایشن نے ایئرلائن کے کرایوں میں اضافے کو خارج از امکان قرار دیا ہے۔