شہباز شریف، سلمان شہباز اور حمزہ شہباز کیخلاف جاری آمدن سے زائد اثاثہ جات اور مبینہ منی لانڈرنگ کیس میں کلیدی پیش رفت

شریف فیملی کیلئے مبینہ منی لانڈرنگ کے الزام میں پانچواں ملزم آفتاب محمود کو گرفتارکرلیا گیا ،نیب لاہو ر

منگل اپریل 23:22

شہباز شریف، سلمان شہباز اور حمزہ شہباز کیخلاف جاری آمدن سے زائد اثاثہ ..
لاہور (اُردو پوائنٹ اخبارتازہ ترین - آن لائن۔ 23 اپریل2019ء) سابق سی ایم پنجاب ملزم شہباز شریف، ملزم سلمان شہباز اور ملزم حمزہ شہباز کیخلاف جاری آمدن سے زائد اثاثہ جات اور مبینہ منی لانڈرنگ کیس میں کلیدی پیش رفت ہوئی۔ نیب لاہور کے مطابق شریف فیملی کیلئے مبینہ منی لانڈرنگ کے الزام میں پانچواں ملزم آفتاب محمود کو گرفتارکرلیا گیا ہے۔ ملزم آفتاب محمود کی گرفتاری نیب لاہور کے زیر حراست ملزم شاہد رفیق سے جاری تحقیقات میں ہونیوالے انکشافات پر عمل میں لائی گئی۔

نیب لاہور کا کہنا ہے کہ دونوں ملزمان آپس میں کزن ہیں جبکہ باہمی رضامندی سے کروڑوں روپے غیرقانونی طور پر شریف فیملی کا اکائونٹس میں منتقل کرتے رہے۔ نیب لاہور حکام کی جانب سے ملزم شاہد شفیق کو دو روز قبل گرفتار کیا گیا جس سے جاری تحقیقات میں اہم پیش رفت اور شواہد حاصل ہوئے ہیں۔

(جاری ہے)

ملزم آفتاب محمود "عثمان انٹرنیشنل"نامی فارن کرنسی ایکسچینج بیک وقت لندن اور برمنگھم سے آپریٹ کرتا رہا تاہم غیرقانونی طور پر حمزہ شہباز، سلمان شہباز و دیگر کے اکائونٹس میں بوگس ٹی ٹی لگاتا رہا۔

پہلے سے گرفتار ملزمان میں فضل داد، قاسم قیوم، محمد مشتاق اور ملزم شاہد رفیق شامل ہیں۔نیب لاہور کی ٹیمیں دوران تحقیقات تاحال شہباز شریف فیملی کیخلاف کم وبیش تین ارب کی مبینہ منی لانڈرنگ کے شواہد حاصل کرچکی ہیں۔تحقیقات کو مزید آگے بڑھانے کیلئے گرفتار ملزم آفتاب محمود کو آج (بروز بدھ) احتساب عدالت کے روبرو پیش کیاجائیگا۔نیب حکام ملزم آفتاب محمود کے 15 روزہ جسمانی ریمانڈ کے حصول کی استدعا کرینگے۔