اللہ کی نعمتوں کے گلاس کو خالی دیکھنے والے ’’خالی‘‘رہتے ہیں ، ڈاکٹر طاہرالقادری

زندگیوں میں صبر شکر کو داخل کریں،شکر کرنے والوں کو اللہ اپنے خزانوں سے نوازتا ہے،منہاج القرآن کے شہر اعتکاف میں ہزاروں مردوخواتین معتکف سے خطاب

پیر 3 جون 2019 22:46

اللہ کی نعمتوں کے گلاس کو خالی دیکھنے والے ’’خالی‘‘رہتے ہیں ، ڈاکٹر ..

لاہور (اُردو پوائنٹ اخبارتازہ ترین - آن لائن۔ 03 جون2019ء) قائد تحریک منہاج القرآن انٹرنیشنل شیخ الاسلام ڈاکٹر محمد طاہرالقادری نے منہاج القرآن کے شہر اعتکاف میں ہزاروں معتکفین سے خطاب کرتے ہوئے کہا کہ جو شخص اپنے اعمال کا خود محاسب بنتا ہے اسکی پریشانیاں ختم ہو جاتی ہیں، اللہ کی نعمتوں کا صدق دل سے اعتراف شکر گزاری سکھاتا ہے، اللہ کی نعمتوں کے گلاس کو خالی دیکھنے والے ’’خالی‘‘رہتے ہیں،اللہ کی نعمتوں کے گلاس کو بھرا ہوا دیکھنے والے بھرے رہتے ہیں، قائد منہاج القرآن نے شہر اعتکاف میں ہزاروں مردوخواتین معتکف سے خطاب کرتے ہوئے کہا کہ اطمینان قلب کے لیے اپنی زندگیوں میں صبر شکر کو داخل کریں،شکر کرنے والوں کو اللہ اپنی نعمتوں اور خزانوں سے نوازتا ہے۔

(جاری ہے)

قائد تحریک منہاج القرآن نے کہا کہ اپنے نفس کا محاسبہ کرنے والے شخص کے لیے نیکیاں کرنا آسان ہو جاتا ہے،جس نے دنیا میں اپنا حساب کیا قیامت کے روز اسکا حساب آسان ہوگا،روحانیت کسی علاقے، شخص،زبان اور لباس کے ساتھ خاص نہیں،تقوی اور روحانیت پر کسی کی اجارہ داری نہیں،روحانی مقام کا انحصار ’’تقوی‘‘پر ہے،بندہ جتنا اپنے من میں جھانکے گا اللہ اتنے رتبے بڑھا دے گا،ظاہر کے چراغ بجھ جاتے ہیں باطن کے چراغ روشن رہتے ہیں،انسانی نفس تاریکی اور روح نیکی کی نمائندہ ہے،نفس کا تعلق شیاطین اور روح کا تعلق ملائکہ کے ساتھ ہے،انسانی زندگی اطاعت الٰہی میں گزارنے کا نام ہے،دنیاوی لذتوں کے معاملے میں نفس کو قابو میں رکھنا صبرہے۔