آسمانی بجلی اور طوفانی بارشوں نے تباہی مچا دی، متعدد افراد جاں بحق

لاہور (اُردو پوائنٹ اخبارتازہ ترین۔ 26 اپریل2024ء) آسمانی بجلی اور طوفانی بارشوں نے تباہی مچا دی، متعدد افراد جاں بحق، بلوچستان، پنجاب اور سندھ کے علاقوں میں آسمانی بجلی گرنے کے واقعات میں کئی افراد جاں بحق، طوفانی بارشوں نے بھی نظام زندگی درہم برہم کر دیا۔ تفصیلات کے مطابق ملک میں طوفانی بارشوں کے نئے سلسلے نے بھرپور انداز میں اثرانداز ہونا شروع کر دیا ہے۔

جمعہ کے روز ملک کے کئی شہروں میں طوفانی بارش و ژالہ باری نے تباہی مچا دی، نظام زندگی درہم برہم کردیا۔ میڈیا رپورٹس کے مطابق جمعہ کے روز ملک کے کئی علاقوں میں آسمانی بجلی گرنے کے واقعات بھی رپورٹ ہوئے۔ کامونکی، جیکب آباد اور دیگر علاقوں میں آسمانی بجلی گرنے کے واقعات میں 4 افراد جان کی بازی ہار گئے، جبکہ طوفانی بارشوں کی وجہ سے بھی 4 افراد جاں بحق ہوئے۔

(جاری ہے)

جبکہ محکمہ موسمیات نے آئندہ چند روز کے دوران مزید طوفانی بارشوں کی پیشن گوئی کی ہے۔ اس حوالے سے متعلقہ اداروں کو الرٹ جاری کر دیا گیا ہے۔ پی ڈی ایم اے نے بھی پیر تک پنجاب کے مختلف اضلاع میں طوفانی بارش اور ژالہ باری کا امکان ظاہر کیا ہے اور اس حوالے سے متعلقہ محکموں کو الرٹ جاری کر دیا گیا ہے۔ پی ڈی ایم اے کا کہنا ہے کہ 26 سے 29 اپریل تک جنوبی پنجاب کے اضلاع میں طوفانی بارشیں ہوں گی۔

جن علاقوں میں بارشیں ہوں گی ان میں مری، گلیات، راولپنڈی، اٹک، جہلم اور چکوال شامل ہیں۔ اس کے علاوہ منڈی بہا الدین، گوجرانوالہ، گجرات، حافظ آباد، سیالکوٹ، نارووال، لاہور، قصور، اوکاڑہ، فیصل آباد، ٹوبہ ٹیک سنگھ، جھنگ، خوشاب، سرگودھا، میانوالی، پاکپتن، ساہیوال میں بارشیں ہوں گی۔ ترجمان پی ڈی ایم اے کے مطابق بیشتر اضلاع میں بارش کے ساتھ ژالہ باری کے بھی امکانات ہیں۔

ڈی جی کے مطابق محکمہ صحت، آبپاشی، تعمیر ومواصلات، لوکل گورنمنٹ، لائیو اسٹاک، محکمہ اطلاعات، واسا، پولیس اور سول ڈیفنس کو الرٹ جاری کر دیا ہے جب کہ انہوں نے پی ڈی ایم اے انتظامیہ کو بھی نشیبی علاقوں میں نکاسی آب کو یقینی بنانے کی ہدایت کی ہے۔