مالی سال کے پہلے مہینہ میں سعودی عرب سے درآمدات میں نمایاں کمی، برآمدات کے حجم میںاضافہ

اتوار 1 ستمبر 2019 11:15

اسلام آباد ۔ یکم ستمبر (اُردو پوائنٹ اخبارتازہ ترین - اے پی پی۔ 01 ستمبر2019ء) رواں مالی سال کے پہلے مہینہ میں سعودی عرب سے درآمدات میں نمایاں کمی جبکہ سعودی عرب کو پاکستانی برآمدات کے حجم میں گزشتہ مالی سال کے مقابلے میں اضافہ ریکارڈ کیا گیاہے۔

(جاری ہے)

سٹیٹ بنک آف پاکستان کی جانب سے جاری کردہ اعدادوشمارکے مطابق جولائی 2019ء میں سعودی عرب سے درآمدات پر پاکستان نے 189.13 ملین ڈالر کازرمبادلہ اداکیا جو گزشتہ مالی سال کے اسی عرصہ کے مقابلے میں 27.37 فیصد کم ہے، گزشتہ مالی سال کے پہلے مہینہ میں سعودی عرب سے درآمدات کا حجم 241.577 ملین ڈالر ریکارڈ کیا گیاتھا۔

اسی طرح جولائی 2017 ء میں سعودی عرب سے درآّمدات پر پاکستان نے 245.873 ملین ڈالر کازرمبادلہ صرف کیا تھا۔اعداد وشمارکے مطابق مالی سال کے پہلے مہینہ میں سعودی عرب کو 30.13 ملین ڈالر کی برآمدات ریکارڈ کی گئیں جوگزشتہ مالی سال کے اسی عرصہ کے مقابلے میں 1.39 فیصد زیادہ ہے۔ گزشتہ مالی سال کے پہلے ماہ میں سعودی عرب کو پاکستانی برآمدات کا حجم 27 ملین ڈالر جبکہ جولائی 2017 ء میں 25.23 ملین ڈالر ریکارڈ کیا گیاتھا۔