ضلع خیبر پور میں کھجور کی سالانہ 7 لاکھ ٹن پیداوار، صرف40 فیصد برآمد کی جاتی ہے

جمعرات 12 ستمبر 2019 10:25

اسلام آباد ۔ (اُردو پوائنٹ اخبارتازہ ترین - اے پی پی۔ 12 ستمبر2019ء) سندھ کے ضلع خیبر پور میں سالانہ 7 لاکھ ٹن کھجور پیدا کی جاتی ہے۔ ضلع میں پیدا ہونے والی 60 فیصد کھجور مقامی مارکیٹ میں فروخت کی جاتی ہے جبکہ پیداوار کا صرف40 فیصد حصہ برآمد کیا جا رہا ہے۔

(جاری ہے)

معروف تجزیہ کار امتیازحسین نے اپنی رپورٹ میں کہا ہے کہ پاکستان، انڈونیشیا، ملائیشیاء، چین، امریکا، برطانیہ، جرمنی کینیڈا سمیت دیگر یورپی ممالک کو تازہ کھجوریں برآمد کرتا ہے جبکہ بھارت اور بنگہ دیش چھوہاروں کے بڑے درآمد کنندگان میں شامل ہیں۔

انہوں نے کہاکہ بھارت اپنی درآمدات کے 80 فیصد کے مساوی چھوہاروں کی درآمدات خیبر پور سے کرتا ہے جبکہ بنگلہ دیش 10 فیصد درآمدات کرتا ہے۔ انہوں نے کہاکہ علاقہ میں پیدا ہونے والی کھجور کی برآمدات میں اضافہ کیا جا سکتا ہے جس کے لئے تحقیق و تربیت، پیکنگ، سٹوریج اور مارکیٹنگ کی سہولیات میں اضافہ کے ساتھ ساتھ کھجور کی بیماریوں پر قابو پانے کی ضرورت ہے۔ انہوں نے کہاکہ کھجور کی برآمدات میں اضافہ سے قیمتی زرمبادلہ کے حصول کو یقینی بنایا جا سکتا ہے۔