وزیراعظم کے مشیر برائے خزانہ ومحصولات عبدالحفیظ شیخ سے سٹی بنک کے سینئر انتظامی عہدیداروں کے وفد کی ملاقات

جمعہ 13 ستمبر 2019 19:15

اسلام آباد ۔ (اُردو پوائنٹ اخبارتازہ ترین - اے پی پی۔ 13 ستمبر2019ء) وزیراعظم کے مشیر برائے خزانہ ومحصولات عبدالحفیظ شیخ سے سٹی بنک کے سینئر انتظامی عہدیداروں کے وفد نے جمعہ کو یہاں ملاقات کی۔ وفد کی قیادت سٹی بنک کے صدر اورکنٹری کارپوریٹ آفیسرندیم لودھی نے کی۔ ملاقات میں پاکستان کی کیپٹل مارکیٹ میں سرمایہ کاری کے مواقع اور ترغیبات پرتفصیلی گفتگو ہوئی۔

(جاری ہے)

وفد نے پاکستان کی اقتصادی اورمالیاتی پالیسیوں پراعتماد کا اظہارکیا۔وفد نے پاکستان میں اقتصادی ترقی کے عمل بالخصوص کیپٹل مارکیٹ میں بھرپورطریقے سے اپنا کرداراداکرنے کا یقین دلایا۔وزیراعظم کے مشیر نے وفد کو حکومت کی اقتصادی اصلاحات، کیپٹل مارکیٹ کے فروغ اورترقی اورغیرملکی سرمایہ کاری میں اضافہ کیلئے حکومتی اقدامات سے آگاہ کیا۔انہوں نے کہاکہ حکومت نے ملک میں کاروبارمیں آسانیوں کے ضمن میں کئی اقدامات کئے ہیں جن کے بہتر نتائج سامنے آرہے ہیں۔