وفاقی دارلحکومت اسلام آباد میں کانگو وائرس کا پہلا کیس سامنے آگیا

کانگو کے مریض کو پمز کے آئسیولیشن وراڈ میں داخل کر لیا گیا ہے، ذرائع

ہفتہ 14 ستمبر 2019 14:12

اسلام آباد (اُردو پوائنٹ اخبارتازہ ترین - این این آئی۔ 14 ستمبر2019ء) وفاقی دارلحکومت اسلام آباد میں کانگو وائرس کا پہلا کیس سامنے آگیا ہے۔ذرائع کے مطابق پاکستان انسٹی ٹیوٹ آف میڈیکل سائنسز (پمز) ہسپتال میں گزشتہ رات کانگو کا مریض لایا گیا جس کا تعلق کوہاٹ سے بتایا گیا ہے۔ نجی ٹی وی کے مطابق ذرائع نے بتایا ہے کہ کانگو کے مریض کو پمز کے آئسیولیشن وراڈ میں داخل کر لیا گیا ہے۔

(جاری ہے)

یاد رہے چند روز قبل کراچی میں کانگو وائرس اور دماغ خور جرثومے نگلیریا نے دو افراد کی جان لے لی تھی،رواں سال کانگو سے پندرہ اور نگلیریا سے بارہ افراد زندگی کی بازی ہار چکے ہیں اس سے قبل لاہور میں بھی کانگو وائرس کا مشتبہ مریض چل بسا تھا۔محکمہ صحت پنجاب کے مطابق کانگو وائرس کا مشتبہ مریض محمد عارف شیرا کوٹ کا رہائشی اور گذشتہ روز 21 اگست سے میں ہسپتال میں زیر علاج تھا۔متاثرہ شخص کے خون کے نمونے لیبارٹری بھجوائے گئے ہیں اور رپورٹ آنے پر ہی اس میں کانگو وائرس کی تصدیق ہو سکے گی۔محکمہ صحت کے مطابق رکشہ ڈرائیور محمد عارف کے اہلخانہ اور اٴْن کے قریبی گھروں کی نگرانی کی جا رہی ہے۔