آن لائن ادائیگی کے پلیٹ فارمز اور ون ونڈو آپریشن نظام کے ذریعے کاروبار شروع کرنا پہلے سے زیادہ آسان ہو چکا ہی ، چیئرمین پی آئی ٹی بی

جمعرات 24 اکتوبر 2019 23:58

لاہور۔24 اکتوبر(اُردو پوائنٹ اخبارتازہ ترین - اے پی پی۔ 24 اکتوبر2019ء) پنجاب آئی ٹی بورڈ کی جانب سے محکمہ صنعت کیلئے جنوری 2018 میں وضع کردہ بزنس رجسٹریشن پورٹل نے پاکستان کو کاروبار میں آسانی کی عالمی درجہ بندی میں 28درجے اوپر لانے میں اہم کردار ادا کیا ہے‘ یہ بات چیئرمین پی آئی ٹی بی اظفر منظور نے ایک جائزہ اجلاس میں بتائی۔

(جاری ہے)

انہوں نے کہا کہ عالمی بینک کی گلوبل ڈوئنگ بزنس کی حالیہ درجہ بندی کے مطابق پاکستان 136ویں پوزیشن سے 108ویں نمبر پر آ گیا ہے جبکہ نیا کاروبار شروع کرنے میں پاکستان 58پوائنٹس کی بہتری کیساتھ 130سے 72ویں نمبر پر آ گیا ہے۔

اجلاس کو بتایا گیا کہ ورلڈ بینک رپورٹ کے مطابق پاکستان نے چھ کاروباری شعبوں میں بہت زیادہ آسانیاں پیدا کیں جن میں نئے کاروبار کا آغاز‘تعمیراتی اجازت نامے‘ٹیکسوں کی ادائیگی‘بجلی کنکشن کے حصول‘پراپرٹی رجسٹریشن اور سرحد پار تجارت شامل ہیں جبکہ پی آئی ٹی بی کے وضع کردہ آن لائن ادائیگی کے پلیٹ فارمز اور ون ونڈو آپریشن نظام کے ذریعے کاروبار شروع کرنا پہلے سے زیادہ آسان ہو چکا ہے۔