پی ٹی آئی کویت چیپٹر کے چیئرمین اخلاق احمد ملک اور صدر پیر امجد حسین کا پاکستان کا دورہ خیر سگالی اور سینئر قیادت سے ملاقات

عمر جمشید جمعرات 14 نومبر 2019 13:28

کویت(اُردو پوائنٹ اخبارتازہ ترین۔ 14 نومبر2019ء،نمائندہ خصوصی،محمد عرفان شفیق،کویت) پی ٹی آئی کویت چیپٹر کے چیئرمین اخلاق احمد ملک اور صدر پیر امجد حسین نے اسلام آباد پاکستان کا دورہ کیا اور سینئر قیادت سے ملاقات اور مستقبل کے لیے مشاورت کی۔ پی ٹی آئی کویت کی قیادت نے وزیر مملکت برائے انسداد منشیات و وزیر مملکت برائے ریاستوں اور سرحدی امور (سیفران) شہریار خان آفریدی اور وفاقی وزیر برائے پارلیمانی امور اعظم خان سواتی سے ملاقات کی اور انکے بھائی اور بہن کی وفات پر اظہار تعزیت کی۔

مزید برآں پی ٹی آئی کویت کے رہنماوں نے وفاقی وزیر برائے ہوابازی غلام سرور سے ملاقات کی اور پی آئی ائے کویت سیالکوٹ سیکٹر بحال کرنے پر خصوصی شکریہ ادا کیا۔

(جاری ہے)

اس موقع پر وفاقی وزیر نے قومی ایئرلائن نے موجودہ کارکردگی کے بارے میں بریف کیا اور کہا کہ کویت لاہور کے سیکٹر کے بحالی پر ترجیحی بنیادوں پر کام کیا جا رہا ہے اور انشااللہ جلد ہی کویت لاہور کے لیے بھی پروازوں کا اجراء ممکن ہو سکے گا۔

اس سے پہلے پی ٹی آئی کویت چیپٹر کے صدر پیر امجد حسین نے وزیراعظم کے معاون خصوصی نعیم الحق سے انکی رہائش گاہ پر خصوصی ملاقات کی اور پی ٹی آئی کویت کی جانب سے انکے لیے نیک خواہشات کا پیغام پہنچایا۔انہوں نے پی ٹی آئی کویت چیپٹر کی جانب سے قومی ایئرلائن کی کویت روٹ کی بحالی پر خصوصی شکریہ بھی ادا کیا۔ پی ٹی آئی کویت کی قیادت نے پی ٹی آئی سینٹرل سیکریٹریٹ اسلام آباد کا دورہ بھی کیا اور او آئی سی سیکرٹری عبداللہ ریاڑ اور ڈاکٹر ابوالحسن سے خصوصی ملاقات کی۔