ایڈز ایک مہلک مرض، احتیاط ہی اس کا بہترین علاج ہے، سی ای او ہیلتھ

سرگودھا (اُردو پوائنٹ اخبارتازہ ترین - اے پی پی۔ 05 دسمبر2019ء) چیف ایگزیکٹو آفیسر ہیلتھ سرگودھا ڈاکٹر ریاض احمد نے کہا ہے کہ ایڈز ایک مہلک مرض لیکن احتیاط ہی اس کا بہتر علاج ہے، اس موذی مرض سے بچائو کیلئے عوام میں اس کے بارے میں آگہی ہونا بے حد ضروری ہے، سرگودھا میں 2008 سے سپیشل میڈیسن کلینک کام کررہا ہے جہاں پر ایڈز کے مریضوں کا علاج کیا جارہا ہے۔

ان خیالات کا اظہار انہوں نے پاکستان میڈیکل ایسوسی ایشن اور ڈی ایچ اے سرگودھا کے زیر انتظام ایچ آئی وی ایڈز کے موضوع پر سیمینار سے خطاب کرتے ہوئے کیا ۔اس کے علاوہ سیمینار سے‘ پی ایم اے کے صدر ڈاکٹر سکندر حیات وڑائچ‘ ڈاکٹر سہیل قاضی اور ڈاکٹر نصر حیات رانجھا نے بھی خطاب کیا۔ڈاکٹر ریاض نے کہا کہ اس بیماری سے بچائو کا بہترین طریقہ احتیاط ہے احتیاط کرکے اس بیماری سے بچا جاسکتا ہے۔

(جاری ہے)

مقررین نے کہا کہ جب کسی انسانی جسم میں ایڈز کا وائرس داخل ہوتا ہے تو وہ شخص 10 سال تک نارمل زندگی گزارتا ہے جس کے بعد وہ ایڈز میں مبتلا ہوکر پیچیدگیوں کا شکار ہوجاتا ہے۔ انہوں نے کہا کہ یہ وائرس متاثرہ انتقال خون سے‘ متاثرہ اوزار سے‘ حجام‘ بیوٹی پارلرز اور عطائی ڈاکٹروں کا ایک ہی سرنج سے علاج کرنا‘ مرد اور عورت کے جنسی تعلقات سے پھیلتا ہے، سرگودھا میں ایڈز سے متاثرہ افراد کی زندگی کو بچانے کیلئے یہاں پر میڈیسن کلینک کام کررہا ہے جس کی وجہ سے مریضوں کی تعداد میں بھی کمی آرہی ہے۔ اس موقع پر واک کا اہتمام کیا گیا تاکہ لوگوں میں شعور پیدا کیا جاسکے۔