چیچہ وطنی، ضلعی انتظامیہ کی طرف سے 3روزہ پولیو مہم کا آغاز پرسوں (سوموار)سے کیا جا رہا ہے

چیچہ وطنی (اُردو پوائنٹ اخبارتازہ ترین - اے پی پی۔ 14 دسمبر2019ء) ضلعی انتظامیہ کی طرف سے بچو ں کو عمر بھر کی معذوری سے بچانے کے لئے 3روزہ پولیو مہم کا آغاز 16دسمبر سے کیا جا رہا ہے جس دوران پولیو ٹیمیں گھر گھر جا کر 5سال سے کم عمر بچوں کو قطرے پلائیں گی ۔مہم کے دوران ضلع ساہیوال میں 4لاکھ 71ہزار بچوں کو ویکسین دی جائے گی، جس میں 2لاکھ81ہزار بچے تحصیل ساہیوال اور ایک لاکھ 90ہزار بچے تحصیل چیچہ وطنی میں ہیں ۔

مہم کی افتتاحی تقریب حاجی عبدالقیوم ہسپتال میں منعقد ہوئی، جس میں کمشنر ساہیوال محمد احسن وحید اور ڈپٹی کمشنر ذیشان جاوید نے بچوں کو پولیو قطرے پلائے ڈائریکٹر ہیلتھ سروسز ڈاکٹر صادق سلیم ،سی ای اوہیلتھ ڈاکٹر اظہر نقوی ،ایم ایس ڈاکٹر ذوالقرنین ،تحریک انصاف کے مقامی رہنما شیخ محمد چوہان اور وحید اصغر ڈوگر ،انجمن تاجران کے صدر محمد ارشد بھٹہ اور نائب صدر افتخار خان سمیت سیاسی و سماجی شخصیات بھی تقریب میں موجود تھیں۔

(جاری ہے)

اس موقع پر اپنے خطاب میں کمشنر محمد احسن وحید نے معاشرے کے تما م فعال طبقات خصوصا علما ء کرام ،اساتذہ اور والدین پر زور دیا کہ وہ ہر بچے کو پولیو ویکسین پلانے کو یقینی بنانے میں انتظامیہ سے تعاون کریں ،کیونکہ نئی نسل کو عمر بھر کی معذور ی سے بچانا ہم سب کا فرض ہے ۔انہوں نے محکمہ صحت کے عملے پر زور دیا کہ وہ اس مہم کو قومی خدمت سمجھ کر ادا کریں۔

تقریب سے خطاب کرتے ہوئے ڈپٹی کمشنر ذیشان جاوید نے کہا کہ گھر گھر مہم کے ساتھ ساتھ تمام بس اڈوں،ویگن سٹینڈ ز ،ریلوے سٹیشنوں ،ہسپتالوں اور مراکز صحت پر پولیو کاؤنٹرز قائم کئے جارہے ہیں تا کہ کوئی بچہ ویکسین سے محروم نہ رہے۔ انہوں نے کہا کہ پوری دنیا میں بد قسمتی سے صرف پاکستان واحد ملک ہے جہاں سے زیادہ پولیو کیسز رپورٹ ہو رہے ہیں جو ہمارے لئے لمحہ فکریہ ہے ضرورت اس امر کی ہے کہ معاشرے کا ہر فرد مکمل یکجہتی سے اس قومی مہم کو کامیاب بنانے میں پولیو ٹیموں سے تعاون کرے۔