وزیراعظم اداروں میں اصلاحات، ترقی اور استحکام چاہتے ہیں،

اسلام آباد (اُردو پوائنٹ اخبارتازہ ترین - اے پی پی۔ 16 جنوری2020ء) وزیر اعظم کے معاون خصوصی برائے قومی صحت ڈاکٹر ظفر اللہ مرزا نے کہا ہے کہ وزیراعظم اداروں میں اصلاحات، ترقی اور استحکام چاہتے ہیں، ڈریپ لوگوں کو دوا کے منفی اثرات سے محفوظ رکھنے والا ادارہ ہے، ہم نے اپنے اداروں کو مضبوط اور شفاف بنانا ہے۔ ان خیالات کااظہار انہوں نے جمعرات کو ڈریپ عمارت کی سنگ بنیاد رکھنے کی تقریب سے خطاب کرتے ہوئے کیا۔

معاون خصوصی نے کہا کہ آج ہم ڈریپ کی عمارت کا سنگ بنیاد رکھنے جا رہے ہیں ۔ انہوں نے کہا کہ ای سی سی کمیٹی میں بلایا گیا، تب پہلی دفعہ ڈریپ عمارت کی منظوری دی گئی تھی، ہمیں کئی مشکلات پیش آئی ہیں، ہمارے پاس ڈریپ کی اپنی عمارت نہیں تھی جس سے نقصان ہوتا ہے کہ بہت سے پروگرام نہیں چلائے جاسکتے۔

(جاری ہے)

انہوں نے کہا کہ پاکستان میں ڈرگ ریگولیٹری ادارہ بنے جس پر عوام اور دوا ساز کمپنیوں کا اعتماد ہو، ادویات کی قیمتوں اور مضر اثرات سے بچاو کے حوالے سے بھی دوا ساز کمپنیوں کیلئے اچھی فعال ریگولیٹری اتھارٹی کا قیام ضروری ہے۔

انہوں نے کہا کہ ڈریپ آنے والے سالوں میں ایک ادارے کی شکل اختیار کر لے گی جہاں لوگ آ کے تربیت حاصل کریں گے، ہم نے اپنے اداروں کو مضبوط اور شفاف بنانا ہے، اداروں میں کرپشن کی زیرو ٹالرنس ہے۔ ڈاکٹر ظفر مرزا نے کہا کہ متعین وقت میں دوائوں کی قیمتیں، لائسنس کا اجراء سب کمپیوٹرائزڈ ہوجائے گا۔ پچاس ملین دستاویزات کو ڈریپ میں ڈیجٹلائز کیا ہے۔ انہوں نے کہا کہ جون 2021ء تک یہ عمارت کھڑی ہوگی۔ فارمیسی کونسل آف پاکستان بھی کرایہ کی عمارت میں ہے، ڈریپ کی بلڈنگ میں ہی فارمیسی کونسل آف پاکستان کو بھی منتقل کریں گے۔