سعودیہ: دُکانوں کے باہر نو پارکنگ کے بورڈ لگانے پر پابندی عائد

ریاض(اُردو پوائنٹ تازہ ترین اخبار۔ 27جنوری 2020ء) سعودی عرب کے ایک بڑے صوبے میں دُکانوں کے باہر نو پارکنگ کے بورڈ لگانے پر پابندی عائد کر دی گئی ہے۔ دُکانداروں اور مارکیٹوں کو انتظامیہ کو پابند کر دیا گیا ہے کہ وہ اپنے احاطے کے باہر نو پارکنگ کے بورڈز نہیں لگائیں گے۔ کیونکہ یہ خلافِ قانون اقدام ہے۔ دُکانوں کے باہر کی سڑک عوام کے لیے ہے۔ کسی بھی دُکاندار کو یہ حق نہیں پہنچتا کہ وہ باہر کی جگہ صرف گاہکوں کے لیے مخصوص کرے۔

اُردو نیوز کے مطابق مشرقی ریجن میں بلدیہ کے ترجمان محمد الصفیان نے بتایا ہے کہ بعض دُکانوں او ر مارکیٹ کے باہر ’ کسٹمرز کے لیے مخصوص ‘ کے بورڈز لگائے جاتے ہیں جو غلط اور خلافِ قانون ہے۔ بلدیہ کی جانب سے صوبہ بھر میں دُکانوں کے باہر لگے نو پارکنگ کے بورڈز ہٹائے جا رہے ہیں۔

(جاری ہے)

ترجمان کے مطابق ’ دکانوں اور مارکیٹ کے باہر گاڑی کھڑی کرنے کی جگہ کسی ایک کے لیے مخصوص نہیں بلکہ ہر شخص خالی جگہ پر گاڑی پارک کر سکتا ہے۔

سڑک پر یا دکانوں کے سامنے خالی پارکنگ کے مقامات عوامی مقام تصور کیے جاتے ہیں۔ ان کا نجی استعمال قطعاً ممنوع ہے۔اگر کوئی شخص کسی کار سوار کو عوامی مقام پر پارکنگ کرنے سے منع کرے گا تو اس پر ایک ہزار سے تین ہزار ریال تک کا جرمانہ ہو سکتا ہے۔ کئی افراد پارک کی گئی گاڑی کے ٹائروں میں سے ہوا بھی نکال دیتے ہیں یا کوئی اور نقصان پہنچاتے ہیں۔

ایسا کرنا بھی جُرم کے زمرے میں آتا ہے۔ جو بھی ایسا کرے گا اُسے گاڑی کو پہنچنے والے نقصان کی ادائیگی کرنا ہو گا۔ عوامی مقامات کو اپنے لیے مخصوص کرنے والے دُکاندار کے خلاف بلدیہ کی جانب سے تادیبی کارروائی کی جائے گی۔ کسی بھی تجارتی مرکز کو اس وقت تک لائسنس جاری نہیں کیاجاتا جب تک وہ وہاں آنے والے صارفین کی گاڑیوں کے لیے عوامی پارکنگ کے علاوہ پارکنگ کی جگہ فراہم نہیں کرتے‘۔