سعودی عرب میں کرونا وائرس کا ایک اور کیس سامنے آ گیا

ریاض(اُردو پوائنٹ تازہ ترین اخبار۔4مارچ 2020ء) سعودی عرب میں کرونا وائرس کا ایک اور کیس سامنے آ گیا، مملکت میں رپورٹ ہونے والے کیسز کی تعداد 2 ہوگئی، وائرس کو کنٹرول کرنے کیلئے ہنگامی بنیادوں پر اقدامات کیے جانے کا سلسلہ جاری۔ تفصیلات کے مطابق میڈیا رپورٹس میں بتایا جا رہا ہے کہ سعودی عرب میں کرونا وائرس کا ایک اور کیس رپورٹ ہوا ہے۔ سعودی حکام کی جانب سے بھی کرونا وائرس کے دوسرے کیس کی تصدیق کر دی گئی ہے۔

بتایا گیا ہے کہ یہ متاثرہ مریض بھی حال ہی میں ایران کا دورہ کر کے پہلے بحرین گیا تھا اور پھر وہاں سے سعودی عرب آیا۔ دوسری جانب کرونا وائرس خدشات باعث سعودی حکومت نے مسجد الحرام اور مسجد نبویﷺ کو زائرین کیلئے بند کر دیا ہے۔ واضح رہے کہ دو روز قبل سعودی عرب میں بھی کرونا وائرس کا پہلا شکار سامنے آیا تھا۔

(جاری ہے)

جس کے بعد سعودی عوام اور تارکین وطن میں بہت زیادہ تشویش پھیل گئی تھی اور حفاظتی تدابیر میں تیزی آ گئی تھی۔

اس سعودی مریض کے حوالے سے بتایا گیا ہے کہ اس کی حالت اب سنبھل چکی ہے۔ العربیہ نیٹ نیوز کے مطابق سعودی عرب میں کرونا وائرس کی صورت حال کا جائزہ لینے والی متعلقہ کمیٹی کا تیرہواں اجلاس منگل کے روز فوڈ اینڈ ڈرگ اتھارٹی کے صدر دفتر میں منعقد ہوا۔اس موقع پر کمیٹی نے اطمینان دلایا کہ جس سعودی شہری کے کرونا وائرس سے متاثر ہونے کا اعلان کیا گیا تھا اب اس کی حالت مستحکم ہے۔

مذکورہ مریض کی بہترین سطح پر دیکھ بھال کی گئی۔کمیٹی نے مزید بتایا کہ کرونا سمیت تمام وائرسوں کا پتہ چلانے کے لیے فوری مداخلت کی ایک خصوصی ٹیم تیار کی گئی ہے۔ یہ ٹیم تجربہ کار اور تربیت یافتہ طبی ماہرین پر مشتمل ہے۔کمیٹی کے مطابق یہ ٹیم پوری شفافیت کے ساتھ کام کرے گی۔ وائرس سے متاثرہ کسی بھی کیس کے نمودار ہونے یا نمونوں کے معائنے کی رپورٹ مثبت آنے کی صورت میں اس کا فوری طور پر اعلان کیا جائے گا۔

متعلقہ کمیٹی نے زور دیا کہ اس حوالے سے آگاہی کی سطح بڑھانے اور افواہوں پر کان نہ دھرنے کی ضرورت ہے۔ کمیٹی نے باور کرایا کہ اس نے کرونا وائرس کے حوالے سے روزانہ کی بنیادوں پر پیش رفت پر گہری نظر رکھی ہوئی ہے۔ کمیٹی نے مزید بتایا کہ اس سلسلے میں عالمی ادارہ صحت (ڈبلیو ایچ او)، دنیا بھر میں متعلقہ اداروں اور مملکت میں مختص خصوصی مراکز کے ساتھ رابطہ کاری جاری ہے۔

واضح رہے کہ مملکت میں اس مہلک وائرس کا شکار ہونے والا شخص مملکت کا شہری ہے جس نے حال ہی میں ایران کا سفر کیا تھا اور بحرین کے راستے ملک میں واپس آیا تھا۔ اس کے کرونا وائرس کے ٹیسٹ مثبت آئے ہیں۔ سعودی عرب کی وزارت صحت نے کہا ہے کہ اس شہری نے بحرین سے مملکت کی داخلی گذرگاہ میں اپنی موجودگی ظاہر نہیں کی تھی اس کے ٹیسٹ کیے گئے،ان کے نتائج مثبت آنے کے بعد اس کو ہسپتال میں داخل کردیا گیا ہے جہاں اسے الگ تھلگ رکھا جارہا ہے اور منظور شدہ طریق کار کے مطابق اس کو علاج ومعالجے کی سہولتیں مہیا کی جارہی ہیں۔