متحدہ عرب امارات میں کورونا کے مزید 546 کیسز اور 11 اموات رپورٹ

کل کیسز کی تعداد 15 ہزار 738 ہوگئی، اب تک 157 افراد جاں بحق ہوئے، 2 ہفتوں کے دوران صحتیاب ہونے والے افراد کی تعداد بھی دگنی ہوگئی

محمد علی بدھ 6 مئی 2020 23:48

ابوظہبی (اُردو پوائنٹ تازہ ترین اخبار۔6مئی2020ء ) متحدہ عرب امارات میں کورونا کے مزید 546 کیسز اور 11 اموات رپورٹ، کل کیسز کی تعداد 15 ہزار 738 ہوگئی، اب تک 157 افراد جاں بحق ہوئے، 2 ہفتوں کے دوران صحتیاب ہونے والے افراد کی تعداد بھی دگنی ہوگئی۔ تفصیلات کے مطابق متحدہ عرب امارات میں گزشتہ 24 گھنٹوں میں مزید 546 افراد میں کورونا وائرس کی تصدیق ہو گئی ہے جس کے بعد مملکت میں کورونا سے متاثرہ افراد کی مجموعی گنتی 15,738 ہو گئی ہے۔

وزارت صحت کے مطابق گزشتہ روز 206 مریض کورونا سے صحت یاب ہو گئے، جس کے بعد کورونا سے شفا یاب ہونے والوں کی کُل گنتی 3,359تک پہنچ گئی ہے۔ وزارت صحت نے بتایا ہے کہ بدھ کے روز 11 مریض کورونا کے ہاتھوں موت کے منہ میں چلے گئے، مملکت میں اب تک 157 افراد جان کی بازی ہار چکے ہیں۔

(جاری ہے)

امارات میں مزید ہزاروں افراد کے کورونا ٹیسٹ کیے جا چکے ہیں۔ دوسری جانب کچھ روز قبل متحدہ عرب امارات کے سربراہ شیخ خلیفہ بن زاید النہیان، دْبئی کے فرمانروا شیخ محمد بن راشد المکتوم، ابوظبی کے ولی عہد شیخ محمد بن زاید النہیان نے امارات میں مقیم تمام مقامی اور غیر ملکی افراد کو خوش خبری دی کہ اماراتی طبی مرکز میں کورونا وائرس کے کامیاب علاج کا تجربہ کامیاب ہو گیا ہے۔

ابو ظہبی کے سٹَیم سیل سنٹر میں ڈاکٹروں اور ریسرچرز کی ایک ٹیم نے سٹیم سیل کے ذریعے کورونا کا مرض ختم کرنے کا طریقہ دریافت کیا ہے۔ اس طریقہ میں کورونا کے مریض کے ختم سے سٹیل سیلز نکالے جاتے ہیں اور پھر انہیں ایکٹیویٹ کر کے دوبارہ مریض میں منتقل کر دیئے جاتے ہیں، جس سے مریض جلد شفایاب ہو جاتا ہے۔ اس منفرد علاج کا تجربہ 73 مریضوں پر کیا گیا ہے سب کے سب شفایاب ہوگئے. مریض کے خون سے نکالے گئے سٹیم خلیے ناک کے ذریعے پھیپھڑوں میں پہنچائے گئے.اس طریقہ علاج کی بدولت پھیپھڑے میں نئے خلیے پیدا ہوتے ہیں اور نئے کورونا کے وائرس کو لگنے سے روک دیتے ہیں. علاوہ ازیں مزید صحت مند خلیوں کو نقصان پہنچانے سے بھی بچاتے ہیں۔

امارات کے سربراہ شیخ خلیفہ بن زاید نے امارات کے عوام اور تارکین وطن کی جانب سے ابوظبی سٹیم سیل کے ڈاکٹرز، ریسرچرز اور دیگر عملے کا کورونا کے علاج میں اہم پیش رفت کرنے پر ان کا شکریہ اداکیا ہے۔ ان کا کہنا تھا کہ اس طریقہ علاج سے دْنیا بھرمیں پھیلی کورونا وبا کے خاتمے میں بے پناہ مدد مِلے گی۔