نیتن یاہو نے ٹرمپ کو دوحہ پر حملہ کرنے سے 50 منٹ پہلے آگاہ کیا تھا‘ امریکی میڈیا کا انکشاف

منگل 16 ستمبر 2025 22:52

واشنگٹن(اُردو پوائنٹ اخبارتازہ ترین - آن لائن۔ 16 ستمبر2025ء)نیتن یاہو کا دوحہ پر حملے سے 50 منٹ پہلے ٹرمپ کو آگاہ کرنے کا انکشاف ہوا ہے۔امریکی میڈیا نے انکشاف میں 3 اسرائیلی حکام کا حوالہ دیتے ہوئے بتایا کہ امریکا کو دوحہ پر میزائل داغے جانے سے پہلے ہی حملے کی اطلاع دے دی گئی تھی۔امریکی میڈیا کے مطابق اسرائیلی حکام نے امریکی میڈیا کو بتایا کہ نیتن یاہو اور ٹرمپ کے درمیان پہلے سیاسی سطح پر بات ہوئی اور پھر فوجی حکام کے ذریعے معلومات فراہم کی گئیں۔

(جاری ہے)

امریکی میڈیا کا کہنا ہے کہ اسرائیلی حکام کا بتانا تھا کہ امریکا صرف دکھاوا کر رہا ہے، اگر صدر ٹرمپ چاہتے تو حملہ روک سکتے تھے لیکن انہوں نے ایسا نہیں کیا اور اگر ٹرمپ اس حملے کی مخالفت کرتے تو اسرائیل قطر پر حملے کا فیصلہ ترک کر دیتا۔واضح رہے کہ اسرائیل نے 9 ستمبر کو دوحہ میں حماس قیادت کو نشانہ بنایا تھا، دوحہ حملے کے بعد وائٹ ہاؤس کا کہنا تھا کہ جب اسرائیلی میزائل فضا میں تھے تب امریکا کو بتایا گیا تھا اور اس وقت صدر ٹرمپ کے پاس مخالفت کا موقع نہیں بچا تھا۔