آپ کے ہاتھ میں موبائل فون ہے تو آپ اسرائیل کا ایک ٹکڑا پکڑے ہوئے ہیں‘ نیتن یاہو

منگل 16 ستمبر 2025 21:48

تل ابیب (اُردو پوائنٹ اخبارتازہ ترین - آن لائن۔ 16 ستمبر2025ء) اسرائیلی وزیراعظم نیتن یاہو نے دعویٰ کیا کہ اگر آپ کے پاس موبائل فون ہے تو آپ اسرائیل کا ایک ٹکڑا پکڑے ہوئے ہیں۔ غیرملکی میڈیا رپورٹس کے مطابق مغربی یروشلم میں دورے پر آئے امریکی کانگریس کے ایک وفد سے ملاقات کے دوران نیتن یاہو نے کہا کہ جس کے پاس بھی موبائل فون ہے وہ اسرائیل کے ٹکڑے کا مالک ہے۔

اسرائیلی وزیراعظم نے پریس کانفرنس سے خطاب کرتے ہوئے موبائل فون، ادویات اورچیری ٹماٹرکا حوالہ دیتے ہوئے کہا کہ امریکا کو اس بات کا احساس ہونا چاہیے کہ وہ اسرائیل سے کتنے فوائد حاصل کرتا ہے۔ انہوں نے کہا کہ آپ جو موبائل فون، ادویات استعمال کرتے ہیں، جو چیری ٹماٹر کھاتے ہیں وہ اسرائیل مہیا کرتا ہے اور آپ سمجھتے ہیں کہ اسرائیل تنہا ہوگیا ہے غزہ میں فوجی کارروائیوں کے خلاف بڑھتی ہوئی بین الاقوامی تنقید اور ہتھیاروں کی ترسیل پر پابندیوں کے خلاف نیتن یاہو نے اسرائیل کا دفاع کیا۔

(جاری ہے)

انہوں نے کہا کہ کچھ ممالک نے ہتھیاروں کی ترسیل روک دی، لیکن وہ اس غلط فہمی میں ہیں کہ ہم اس صورتِ حال پر قابو نہیں پاسکتے بلکہ ہم ایسا کر سکتے ہیں کیونکہ ہم ہتھیار بنانے میں اچھے ہیں۔ بالکل اسی طرح جس طرح ہم امریکی انٹیلی جنس کو خفیہ معلومات اور ہتھیاروں کا نظام فراہم کرتے ہیں۔ نیتن یاہو نے مزید کہا کہ مغربی یورپ میں جو سمجھتے ہیں کہ وہ اسرائیل کو تنہا کردیں گے وہ کبھی کامیاب نہیں ہوسکتے۔ ہم قدر کرتے ہیں کہ امریکی حمایت اب بھی اسرائیل کے ساتھ برقرار ہے۔