حکومت کی کلین اینڈ گرین پنجاب مہم کے تحت 6 کلومیٹر طویل جہلم فلڈ بندپر 9200 نئے پودے لگائے گئے ہیں،ڈپٹی کمشنر جہلم

عمر جمشید منگل 7 جولائی 2020 17:06

جہلم (اُردو پوائنٹ اخبارتازہ ترین۔ 07 جولائی2020ء،نمائندہ،خصوصی،طارق مجید کھوکھر) ڈپٹی کمشنر جہلم راؤپرویز اخترنے کہا ہے وزیر اعظم پاکستان کے ویژن اور بزدارحکومت کی کلین اینڈ گرین پنجاب مہم کے تحت 6 کلومیٹر طویل جہلم فلڈ بندپر 9200 نئے پودے لگائے گئے ہیں۔محکمہ جنگلات دفتر کی نرسری میں دو لاکھ پوددے نرسری میں موجود ہیں۔ان خیالات کا اظہارڈپٹی کمشنرراؤپرویز اختر نے جہلم کے حفاظتی بند پر محکمہ جنگلات جہلم کی جانب سے لگاے گئے پودوں کی انسپکشن کی اور سلیمان پارس دفتر کی نرسری کا دورہ کرتے ہوئے کیا ۔

اس موقع پر فلڈ بند پر لگے پودوں کے بارے ڈویژنل فارسٹ آفیسر جہلم نعمان ارشد نے بریفنگ دی۔

انہوں نے بتایا ہے کہ جہلم فلڈ بند پردس ہزار کے قریب نئے پودے لگائے گئے ہیں۔

(جاری ہے)

انہوں نے کہا ہے کہ پودوں کی بھرپور دیکھ بھال بھی کی جا رہی ہے ۔ پودوں کی نشونما، اور انکی بہتر دیکھ بھال کے لئے حکمت عملی اپنائی جا رہی ہے ۔

تمام پودوں کی دیکھ بھال اور انکو بروقت پانی فراہم کیا جا رہا ہے ۔ اس موقع پر انہوں نے مزید بتایا ہے کہ اس پراجیکٹس میں پھل دار، پھول دار اور سایہ دار پودے لگا کر جہلم شہر کی خوبصورتی میں اضافہ کرنے میں مدد حاصل ہوئی ہے ۔ڈپٹی کمشنر نے کہا کہ ماحولیاتی تبدیلوں پر قابو پانے اور محفوظ مستقبل کے لیے زیادہ سے زیادہ پودے لگانے اور انکی دیکھ بھال کرنا ہو گی ۔اس موقع پر اے ڈی سی جی سید نذارت علی ،اے سی جہلم ذوالفقار احمداور دیگر افسران موجود تھے۔