جنوبی پنجاب سیکرٹریٹ میں ایڈیشنل چیف سیکرٹری اور ایڈیشنل آئی جی کی تعیناتی کیخلاف درخواست پر پنجاب حکومت کو نوٹس جاری

جمعرات 9 جولائی 2020 13:38

لاہور(اُردو پوائنٹ اخبارتازہ ترین - این این آئی۔ 09 جولائی2020ء) لاہور ہائیکورٹ نے جنوبی پنجاب سیکرٹریٹ میں ایڈیشنل چیف سیکرٹری اور ایڈیشنل آئی جی کی تعیناتی کے خلاف درخواست پر پنجاب حکومت کو نوٹس جاری کرتے ہوئے جواب طلب کر لیا ۔چیف جسٹس لاہور ہائیکورٹ جسٹس محمد قاسم خان نے لائرز فائونڈیشن فارجسٹس کی جانب سے دائر درخواست پر سماعت کی ۔

(جاری ہے)

درخواست میں موقف اپنایا گیا ہے کہ حکومت نے تقرریاں کرتے وقت قانون کی پاسداری نہیں کی،گورنر پنجاب کی منظوری کے بعد دونوں افسروں کی جنوبی پنجاب سیکرٹریٹ میں تعیناتی کا حکم جاری کیا گیا ہے،حکومت کی جانب سے ابھی تک جنوبی پنجاب سیکرٹریٹ کیلئے علاقائی حدود کا تعین نہیں کیا گیا۔آئین وقانون کے مطابق صوبائی اسمبلی سے دو تہائی اکثریت کی منظوری کے بعد ہی ترمیمی بل صدر مملکت کو بھجوایا جا سکتا ہے، آئین کے آرٹیکل 239 میں آئینی ترمیم کے بغیر یہ تقرریاں کی گئی ہیں۔

استدعا ہے کہ جنوبی پنجاب سیکرٹریٹ میں ایڈیشنل چیف سیکرٹری اور ایڈیشنل آئی جی کی تعیناتی کا نوٹیفکیشن آئین سے متصادم قرار دے کر کالعدم کیا جائے اوردرخواست کے حتمی فیصلے تک نوٹیفکیشن پر عملدرآمد روکا جائے۔