موجودہ موسم ڈینگی لاروا کی افزائش کا موجب بن سکتا ہے لہٰذا بارشوں کے پانی کی نکاسی کو فوری طور پر یقینی بنایا جائے ،ڈپٹی کمشنر قصور

قصور (اُردو پوائنٹ اخبارتازہ ترین - اے پی پی۔ 01 ستمبر2020ء) ڈپٹی کمشنر قصور منظر جاوید علی نے کہا ہے کہ موجودہ موسم ڈینگی لاروا کی افزائش کا موجب بن سکتا ہے لہذا بارشوں کے پانی کی نکاسی کو فوری طور پر یقینی بنایا جائے ،قبرستانوں ، ٹائر شاپس ، جوہڑوں اور دیگر مقاما ت کا روزانہ کی بنیاد پر معائنہ کیا جائے اور لاروا سائیڈنگ کی جائے ،ضلعی افسران ڈینگی مچھر کیخلاف انسدادی و احتیاطی اقدامات کو مزید موثر انداز میں انجام دیں ۔

یہ بات انہوں نے گزشتہ روز ڈی سی کمیٹی روم میں ڈینگی تدارک اور محکموں کی کارکردگی کا جائزہ لینے کیلئے منعقدہ اجلاس کی صدارت کرتے ہوئے کیا ۔ اجلاس میں تمام متعلقہ محکموں کے افسران نے شرکت کی ۔ اجلاس کو محکمہ ہیلتھ کے افسران نے بریفنگ دی۔

(جاری ہے)

ڈپٹی کمشنر نے تمام سرکاری ہسپتالوں کے میڈیکل سپریٹنڈنٹس کو ہدایت کی کہ ڈینگی کے مشتبہ اور پروبیبل کیسز ایس او پیز کے مطابق رپورٹ کریں اور حقیقت پر مبنی ڈیٹا جمع کروائیں ۔

انہوں نے تمام میونسپل کمیٹیوں کو ہدایت کی کہ اپنے اپنے علاقوں میں موجود قبرستانوں میں صفائی ستھرائی کو یقینی بنائیں اور تمام سرکاری دفاتر کی سرویلنس رپورٹ تیار کی جائے ۔ اجلاس کو بتایاگیا کہ فش سٹاکنگ کا عمل مکمل ہو چکا ہے اور ضلع بھر کے تمام جوہڑوں میں مچھلی بچہ چھوڑ دیا گیا ہے ۔ ڈپٹی کمشنر نے تمام اسسٹنٹ کمشنرز کو ہدایت کی کہ تھرڈ پارٹی ویلی ڈیشن کے عمل کو مزید تیز کیا جائے اور تمام سرگرمیوں کی خود نگرانی کریں ۔

انہو ں نے خبردار کیا کہ ڈینگی لاروا کی افزائش کا موجب بننے والوں کیخلاف قانونی کاروائی کی جائیگی لہذا ماحول کو خشک اور صاف رکھیں اور کسی جگہ پانی کھڑا نہ ہونے دیں تا کہ ڈینگی کا مسئلہ سر نہ اٹھا سکے ۔ڈپٹی کمشنر قصور نے کہا کہ ڈینگی کیساتھ ساتھ ضلع بھر میں موجود آوارہ کتوں کے خلاف آپریشن کیا جائے ۔ انہوں نے ہدایت کی کہ محکمہ ہیلتھ اور لوکل گورنمنٹ ملکر آوارہ کتوں کے خلاف فوری آپریشن کریں تا کہ شہری آوارہ کتوں سے محفوظ رہ سکیں۔ انہوں نے کہا کہ شہریوں کی جان و صحت کی حفاظت ہماری اولین ترجیح ہے اس سلسلے میں کسی بھی قسم کی کوتاہی کو برداشت نہیں کیا جائیگا۔