پاکستان پٹرولیم کی آمدنی میں گزشتہ مالی سال کے دوران 18.5 فیصد کمی

بدھ 23 ستمبر 2020 11:36

اسلام آباد (اُردو پوائنٹ اخبارتازہ ترین - اے پی پی۔ 23 ستمبر2020ء) گزشتہ مالی سال 2020 کے دوران پاکستان پٹرولیم لمیٹڈ (پی پی ایل) کی بعد از ٹیکس آمدنی میں 18.5 فیصد کمی ہوئی ہے۔ پاکستان سٹاک ایکسچینج (پی ایس ایکس) کو بھیجے گئے کمپنی کے مالیاتی اعداد وشمار کے مطابق گزشتہ مالی سال میں جولائی تا جون 2019-20 کے دوران پی پی ایل کی خالص آمدن 50 ارب 25 کروڑ 60 لاکھ روپے تک کم ہو گئی جبکہ کے اس کے مقابلہ میں جولائی تا جون 2018-19 کے لئے کپنی کو 61 ارب 63 کروڑ 20 لاکھ روپے کی بعد از ٹیکس آمدن حاصل ہوئی تھی۔

اس طرح مالی سال 2019 کے مقابلہ میں مالی سال 2020 میں پاکستان پٹرولیم لمیٹڈ کی بعد از ٹیکس آمدن میں 11 ارب 37 کروڑ 60 لاکھ روپے یعنی 18 فیصد سے زیادہ کی کمی ریکارڈ کی گئی ہے۔ رپورٹ کے مطابق بعد از ٹیکس منافع میں کمی کے نتیجہ میں پی پی ایل کی فی حصص آمدنی بھی 22.65 روپے کے مقابلہ میں 18.47 روپے فی حصص تک کم ہو گئی ہے۔

(جاری ہے)

مزید برآں گزشتہ مالی سال میںپی پی ایل کو صارفین کے ساتھ معاہدوں کی صورت میں ہونے والی آمدن بھی 3.8 فیصد کمی سے ایک کھرب 63 ارب 89کروڑ روپے کے مقابلہ میں ایک کھرب 57 ارب 59 کروڑ 30 لاکھ روپے تک کم ہوئی ہے جبکہ آپریٹنگ اخراجات6.9 فیصد اضافہ سے 40 ارب 70 لاکھ روپے کے مقابلہ میں 42 ارب 76 کروڑ روپے تک بڑھ گئے جس کے نتیجہ میں کمپنی کی عمومی آمدن مالی سال 2019 کے مقابلہ میں 2020 کے دوران 8.6 فیصد کم ہوئی ہے جس کے نتیجہ میں پی پی ایل کے بعد از ٹیکس منافع میں کمی ہوئی ہے۔