ایف پی سی سی آئی اور اسلامک چیمبر آف کامرس اینڈ ڈیولپمنٹ کا مشترکہ طور پر ایگری فوڈ کانفرنس منعقد کروانے کا اعلان

جمعرات 30 اپریل 2026 17:05

کراچی (اُردو پوائنٹ اخبارتازہ ترین - این این آئی۔ 30 اپریل2026ء) صدر ایف پی سی سی آئی عاطف اکرام شیخ نے اعلان کیا ہے کہ ایف پی سی سی آئی ، اسلامک چیمبر آف کامرس اینڈ ڈیولپمنٹ (ICCD) کے اشتراک سے‘‘ایگری فوڈ: گلوبل انویسٹمنٹ اینڈ پارٹنرشپ کانفرنس اینڈ ایکسپو’’کا انعقاد کرے گی۔ یہ ایونٹ 14 مئی 2026 کو کراچی میں ICCD ہیڈکوارٹر میں منعقد ہوگا۔صدر ایف پی سی سی آئی عاطف اکرام شیخ نے کہا کہ یہ اقدام سرمایہ کاری کے فروغ، بین الاقوامی شراکت داری میں بہتری اور پاکستان کی زراعت اور زرعی صنعتوں کی بے پناہ صلاحیت کو اجاگر کرنے کے عزم کی عکاسی کرتا ہے۔

انہوں نے مزید کہا کہ وہ ایف پی سی سی آئی اور ICCD کے مابین اس اہم اشتراک کی مکمل حمایت کرتے ہیں اور ایگری فوڈ سیکٹر میں مقامی و بین الاقوامی اسٹیک ہولڈرز کے درمیان مؤثر روابط کو فروغ دینے کے لیے پُرعزم ہیں۔

(جاری ہے)

صدر ایف پی سی سی آئی عاطف اکرام شیخ نے اس بات پر زور دیا کہ یہ ایونٹ تجارتی روابط کو مضبوط بنانے، سرمایہ کاری کو راغب کرنے اور پاکستان کے زرعی شعبے کہ جو قومی معیشت کا ایک اہم ستون ہے کی صلاحیت کو عالمی سطح پر اجاگر کرنے کے لیے ایک مؤثر پلیٹ فارم ثابت ہوگا۔

انہوں نے ایونٹ کے کامیاب انعقاد کے لیے فیڈریشن کے بھرپور تعاون کی یقین دہانی کروائی اور کہا کہ FPCCI، ICCD کے ساتھ اپنے مضبوط اشتراک کار کو جاری رکھے گی۔ اس موقع پر ملک بھر کے زرعی چیمبرز کے نمائندگان، مختلف شعبہ جات کے رہنما جن میں زرعی ادویات، کھاد (یوریا)، بیج، متعلقہ صنعتیں اور تعلیمی ادارے شامل ہیں، بھرپور شرکت کریں گے۔ اس کے علاوہ اہم چیمبرز آف کامرس اینڈ انڈسٹری کے نمائندگان کی شرکت بھی متوقع ہے۔صدر ایف پی سی سی آئی عاطف اکرام شیخ نے کہا کہ بدلتی ہوئی عالمی و علاقائی صورتحال کے پیش نظر بین الاقوامی مندوبین اور سفارتی برادری کے اراکین سمیت اعلیٰ سطح کی وسیع شرکت کو بھی یقینی بنایا جائے گا۔