سرکاری شخصیات کو منشیات سپلائی کرنے والا نیٹ ورک پکڑا گیا

منشیات تعلیمی ادارے سمیت پارٹیوں اور اہم شخصیات کو فروخت کی جاتی تھیں،ذرائع

ہفتہ 3 اکتوبر 2020 16:17

اسلام آباد(اُردو پوائنٹ اخبارتازہ ترین - این این آئی۔ 03 اکتوبر2020ء) اینٹی نارکوٹکس فورس نے اسلام آباد میں آپریشن کرتے ہوئے نجی اور سرکاری شخصیات کو منشیات فراہ کرنے والا بڑا گروہ پکڑ لیا۔اے این ایف حکام کے مطابق اینٹی نارکوٹکس فورس نے اسلام آباد میں خفیہ اطلاعات پر بڑا آپریشن کرکے اہم پرائیوٹ اور سرکاری شخصیات کو منشیات کی سپلائی کرنے والا نیٹ ورک پکڑ لیا، گرفتار ہونے والوں میں ایک خاتون اور ایک غیرملکی سمیت 7 افراد شامل ہیں، غیرملکی ملزم بیرون ملک سے منشیات پاکستان لاتا رہا ہے۔

(جاری ہے)

اے این ایف حکام نے بتایا کہ آپریشن وفاقی دارالحکومت کے علاقوں ایف ٹین، ایف الیون ، ایف سیون اور جی بارہ میں کیا گیا، آپریشن کے دوران 30 کروڑ مالیت کی ہیروئن، آئس اور گولیاں برآمد ہوئیں، دیگر منشیات میں کوکین۔ ایکس ٹی سی گولیاں اور چرس بھی شامل ہیں۔اے این ایف حکام کے مطابق ملزمان منشیات تعلیمی اداروں سمیت پارٹیوں اور اہم شخصیات کو فروخت کرتے تھے، پرائیوٹ اور سرکاری شخصیات کے نام خفیہ رکھے جارہے ہیں، جب کہ ایک ملزم نے پولیس اہلکاروں کو بھی منشیات فراہم کرنے کا اعتراف کیا ہے، ملزمان کے موبائل ڈیٹا سے دیگر اہم لوگوں کا ڈیٹا بھی حاصل کر لیا گیا ہے۔