عوام میں چھاتی کے کینسر سے متعلق آگاہی پیدا کرنے کی اشد ضرورت ہے،، بیگم ثمینہ عارف علوی

آگاہی نہ ہونے کی وجہ سے ہر سال ہزاروں خواتین چھاتی کے کینسر کی وجہ سے انتقال کرجاتی ہیں جس کیلئے ہمیں کام کرنا چاہئے

اتوار 25 اکتوبر 2020 23:20

کراچی(اُردو پوائنٹ اخبارتازہ ترین - این این آئی۔ 25 اکتوبر2020ء) خاتون اول بیگم ثمینہ عارف علوی نے کہاہے کہ آگاہی نہ ہونے کی وجہ سے ہر سال ہزاروں خواتین چھاتی کے کینسر کی وجہ سے انتقال کرجاتی ہیں، جس کے لیے ہمیں کام کرنا چاہئے۔

(جاری ہے)

آغا خان یونیورسٹی اسپتال کراچی میں چھاتی کے کینسر سے متعلق آگاہی کے پروگرام سے خطاب کرتے ہوئے انہوں نے کہاکہ عوام میں چھاتی کے کینسر سے متعلق آگاہی پیدا کرنے کی اشد ضرورت ہے کیونکہ پاکستان میں چھاتی کے کینسر کے کیسز کی بہت بڑی تعداد اس وقت رپورٹ ہوتی ہے جب یہ بیماری مریض میں پھیل چکی ہوتی ہے۔

انہوں نے کہاکہ چھاتی کے کینسر کی بیماری کیلیے حکومت اور مخیر حضرات کو آگے آنا ہوگا تاکہ دوردراز علاقوں میں اس مرض میں مبتلا خواتین کو وقت پر علاج میسرآسکے ۔اس موقع پر آغا خان یونیورسٹی اسپتال کی بریسٹ کینسر سرجن ڈاکٹر عابدہ ستار ، آغا خان میڈیکل کالج کے ڈین ڈاکٹر عادل حیدر اور دیگر ڈاکٹرز نے اپنے خطاب میں چھاتی کے کینسر پر آغا خان یونیورسٹی اسپتال کی خدمات سے متعلق آگاہ کیا اور اپیل کی کہ چھاتی کے کینسر جیسے موذی مرض سے نمٹنے کیلیے آغا خان یونیورسٹی کو عطیات دیئے جائیں۔