لانگ مارچ اقتدار سے کوسوں دور مولانا فضل الرحمان کا اپنی جیب گرم رکھنے کا بہانہ ہے‘فیاض الحسن چوہان

حکومت میں شامل اتحادی جماعتوں کی جانب سے پی ڈی ایم کو ٹکا سا جواب ملنے کے بعد حکومت پہلے سے زیادہ مضبوط ہے

پیر 8 مارچ 2021 21:03

لانگ مارچ اقتدار سے کوسوں دور مولانا فضل الرحمان کا اپنی جیب گرم رکھنے ..

لاہور(اُردو پوائنٹ اخبارتازہ ترین - این این آئی۔ 08 مارچ2021ء) صوبائی وزیر جیل خانہ جات فیاض الحسن چوہان نے کہا ہے کہ ’’کڑوا کڑوا تھو، میٹھا میٹھا ہپ‘‘کے فارمولے پر کاربند نام نہاد اتحادی اپوزیشن جماعتیں ملک پر اپنی مرضی کا غاصبانہ نظام دوبارہ رائج کرنا چاہتی ہیں۔ اپنے بیان میں انہوں نے کہا کہ گزشتہ سال کی طرح اس سال بھی اپوزیشن استعفوں کا چلا ہوا کارتوں استعمال کرے گی۔

(جاری ہے)

پی ڈی ایم جانتی ہے کہ اسمبلیوں سے استعفے دینے کے بعد انکا دوبارہ اقتدار میں آنا ناممکن ہے۔ انہوں نے مزید کہا کہ لانگ مارچ اقتدار سے کوسوں دور مولانا فضل الرحمان کا اپنی جیب گرم رکھنے کا بہانہ ہے۔ گزشتہ سال کی طرح اس سال بھی مولانا فضل الرحمان اتحادی جماعتوں بالخصوص پیپلز پارٹی اور پاکستان مسلم لیگ ن سے چار سے پانچ ارب روپے ہتھیانے کے چکروں میں ہیں۔ انہوں نے کہا کہ حکومت میں شامل اتحادی جماعتوں کی جانب سے پی ڈی ایم کو ٹکا سا جواب ملنے کے بعد وزیر اعظم عمران خان کی قیادت میں حکومت پہلے سے زیادہ مضبوط ہے۔