الیکشن کمیشن آف پاکستان نے باضابطہ طورپر وفاقی حکومت کو خط لکھ کرانتخابی اصلاحات پر تحفظات سے آگاہ کر دیا

قومی اسمبلی سے منظور کردہ الیکشن ایکٹ کی کئی شقیں آئین سے متصادم ہیں، معاملے کو وزیر اعظم کے نوٹس لایا جائے ،الیکشن کمیشن کے خط کا متن

ہفتہ 19 جون 2021 18:23

اسلام آباد(اُردو پوائنٹ اخبارتازہ ترین - این این آئی۔ 19 جون2021ء) الیکشن کمیشن آف پاکستان نے باضابطہ طورپر وفاقی حکومت کو خط لکھ کرانتخابی اصلاحات پر تحفظات سے آگاہ کر تے ہوئے ترامیم کے معاملے کو وزیرِ اعظم عمران خان کے نوٹس میں لانے کا مطالبہ کر دیا۔الیکشن کمیشن آف پاکستان نے وزارتِ پارلیمانی امور سے خط لکھ کر رابطہ کیا اور حکومت کو الیکشن ترمیمی بل پر اعتراضات تحریری طور پر بتا دیئے ہیں۔

(جاری ہے)

سیکرٹری الیکشن کمیشن نے سیکریٹری پارلیمانی امور کو خط لکھا ہے جس میں کہا گیا کہ قومی اسمبلی سے منظور کردہ الیکشن ایکٹ کی کئی شقیں آئین سے متصادم ہیں۔الیکشن کمیشن نے اپنے خط میں کہا کہ آبادی کی بجائے ووٹرز پر حلقہ بندیوں کی تجویز آئین سے متصادم ہے، سینیٹ الیکشن کی سیکرٹ کی بجائے اوپن ووٹنگ آئین اور سپریم کورٹ کی رائے کے خلاف ہے۔حکومت کو لکھے خط میں الیکشن کمیشن نے کہا کہ ووٹرز لسٹوں کا اختیار آئین کے مطابق الیکشن کمیشن کا ہے، مجوزہ الیکشن ایکٹ کی 13 شقیں آئین سے متصادم ہیں۔