پاکستان ڈیموکریٹک موومنٹ کا29 جولائی کو کراچی میں جلسہ کا اعلان

کراچی(اُردو پوائنٹ اخبارتازہ ترین - این این آئی۔ 21 جون2021ء) پاکستان ڈیموکریٹک موومنٹ نی29 جولائی بروز جمعرات کو کراچی میں جلسہ عام کا اعلان کیاہے ، جلسہ عام کی تیاریوں کے سلسلے میں پی ڈی ایم میں شامل تمام جماعتوں کے صوبائی زمہ داران کا اہم اجلاس جے یوآئی کے صوبائی سیکرٹری جنرل مولانا راشد محمود سومرو کی صدارت میں جے یوآئی بزنس فورم کے صدر امین اللہ کی رہائش گاہ پر منعقد ہوا۔

اجلاس میں مسلم لیگ(ن)سندھ کے صدر شاہ محمد شاہ ،سینئر نائب صدر علی اکبر گجر ، قومی وطن پارٹی کے سردار احمد نواز، پشتونخواہ میپ کے محمد سکندر خان ، مرکزی جمعیتِ اہلحدیث کے مولانا محمد یوسف قصوری، جے یو پی کے مولانا غلام غوث صابری ، نیشنل پارٹی کے مجید ساجدی جبکہ جے یوآئی کے مرکزی ترجمان محمد اسلم غوری ، صوبائی نائب امیر مولانا عبدالکریم عابد، ڈپٹی سیکرٹری اطلاعات سندھ محمد سمیع الحق سواتی ودیگر نے شرکت کی ۔

(جاری ہے)

پی ڈی ایم سندھ کے قائدین نے واضح کیا کہ جعلی حکمرانوں کیخلاف عوامی تحریک کو سندھ میں نئی روح نکلے گی اور حکمران جلد منطقی انجام تک پہنچیں گے ، 29 جولائی کو کراچی میں پی ڈی ایم کا جلسہ عام تاریخ ساز ثابت ہوگا ۔اجلاس میں جلسہ عام کا کامیابی کیلئے مختلف کمیٹیوں کے قیام پر اتفاق کیا گیا جس کا اعلان جلد اتفاق رائے سے کیا جائے گا۔