اسرائیل کا غزہ کی سمندری شکارگاہ کی توسیع اور دیگر اقدامات کا اعلان

آج سے غزہ میں عالمی برادری کی جانب سے جاری منصوبوں کے لیے ساز و سامان درآمد کرنے کی اجازت ہو گی،صیہونی حکام

ہفتہ 31 جولائی 2021 16:32

مقبوضہ غزہ (اُردو پوائنٹ اخبارتازہ ترین - این این آئی۔ 31 جولائی2021ء) اسرائیلی حکومت نے غزہ کی پٹی کے ساحلوں کے مقابل شکار کے لیے اجازت یافتہ علاقے میں توسیع اور بعض دوسرے اقدامات کا اعلان کیا ہے۔میڈیارپور ٹس کے مطابق اسرائیلی وزارت دفاع میں فلسطینی اراضی میں حکومتی کارروائیوں کے نظم و نسق کے یونٹ نے ایک بیان میں بتایا ہے کہ سیکورٹی کی صورت حال کی بنیاد پر غزہ کی پٹی میں شکار کے علاقے میں جمعے کی صبح سے توسیع کردی گئی ۔

اس طرح شکار کا علاقہ 6 سمندری میل سے بڑھ کر 12 سمندری میل تک ہو جائے گا۔

(جاری ہے)

بیان میں مزید بتایا گیا کہ اتوار کے روز سے غزہ میں عالمی برادری کی جانب سے جاری منصوبوں کے لیے ساز و سامان درآمد کرنے کی اجازت ہو گی۔غزہ کی پٹی کی آبادی بیس لاکھ کے قریب ہے۔ اس پر ایک دہائی سے زیادہ عرصے سے فلسطینی تنظیم حماس کا کنٹرول ہے۔البتہ غزہ کی پٹی کے ماہی گیروں کے لیے سمندر کا کھولا جانا یا بند کرنا یہ فریقین کے بیچ کشیدگی کی سطح کے ساتھ مربوط ہے۔اس سے قبل 12 جولائی کو اسرائیلی فوج کے ترجمان افیخائی ادرعی نے بتایا تھا کہ اسرائیل نے غزہ کی پٹی میں سمندری شکار کے رقبے میں توسیع کا فیصلہ کرتے ہوئے اسے 9 سمندری میل سے بڑھا کر 12 سمندری میل کر دیا ہے۔